العشر بس بريال - الهيـــــــــــــلا *** منتدى قبيلة عتيبة

عقاب بن سقيان العتيبي · 12-Aug-2008, 12:53 AM

بسم الله الرحمن الرحيم
ايها الساده الكرام
السلام عليكم ورحمة الله وبركاته
هذه المره الاولى التي اكتب لكم قصه وقصيده وهي جرت علي منذ زمن ولكن لامانع من القديم فقد قال لي احد الاعضاء (انبش القديم يابو زياد) القصه/ جاني احد الاصدقا وكان عليه دين فقال لي انا اريدك تذهب معي الى الشيخ فلان لعله يسدد عني ديني فقلت له لو تسترفد ربعك الروقه احسن للك فقال ياعقاب انا جاي ابيك تروح معي للرجال ولاجيت الا انت ولا ودي احد يروح معي الا انت فقلت ابشر بعزك لكن قلي عن الشيخ في اي حي وانا اروح بك له فذهبنا للشيخ وكان معه صك واوراق فقدمناها على الشيخ
ولكن المفاجئه ان الشيخ ما اعطاه الا مبلغ زهيد جدا مع ان دينه كان لايقل عن ثمانين الف فسئلت احد رجاله فقلت ياخي الشيخ مااعطانا شي يذكر لكن افحص صكنا واوراقنا قد تكون قديمه او غير موثقه فقال مباشره هذا هو عطا الشيخ فالشيخ تراه (حضرمي) فجات القصيده
القصيـــــــــــــــــــــــــــــــــــــــــــده

ياللي تقول انك على الجود قاوي=ليت لك في ساحة هل الفزعه رحال
لو جدك ابن حميد ولا العطاوي=بانت موار الشيوخ ياسمح الاقبال
اسمعني ان كانك لقولي شفاوي =الله يعز اللي لهم حكم وظلال
دور نصيبك لاتفوت الحراوي=مادام هي سوق بلا ابواب واقفال
ليتك تعيش بخير خل الهقاوي=الجود يبغاله ورا النقض فتال
وعزم يجيب النجم بالكف هاوي=ويمنى تكيل وبيت عز وسعة بال
وغدو طير لاضوى الليل ضاوي=وحض تعيل ام الفشق عنه ماعال
يالله انا ما زلت يمك رجاوي=رجوى الذليل اللي تذلل وهو ذال
في ذلته لك عز لو هو نداوي=به ضيقة من عصر بالصدر تجتال
نكايب الدنيا حياة الدناوي=عذني ترى مالي عن الحق محوال
لي قصة ماسجلت عند راوي=ثلثينها ضنك وهوا نفس وجدال
والثلث الاخر بيع نقد وشراوي=كسبان لو بعت العشر بس بريال
ومعها هدية شمغ ولافراوي=وهليل هليل ولوصار هلال
ان جمعت وان فرقت وش تساوي=ترجح خسايرها جبل طي وجبال
يقطعك ياشيص الخلاص الحساوي=لااسقاك من غر المزابير همال
لياطالت البلوى تجيب البلاوي=مثل الردي لجالسك جاك بالقال
هجر الديار ولا حياة المناوي=طب النصيب اللي على صاحبه مال
انشدك يالفطن النبيه الحماوي =هاة الصحيح ولا يجي معه مثقال
الكذب عيب وجاوة الجاو جاوي=عاقل واميز واعرف الشؤم والفال
انشدك عن رجل كريم غناوي=يكرمك من مالك وهو مامعه مال
توه حدث ماعاش عصر الخلاوي=عز الله انه في المهمات رجال
يوم الردي فيما يعزه يراوي=نفعة صديق مايبي غير فنجال
قضاي حاجه والطريق متساوي=والله خلقها سفرة طوع وسهال

شعر/ عقاب بن سقيان العتيبي

هذه القصيده كتبت الأصل في منتدى (((يمنع ذكر اسماء المنتديات الاخرى)))

معجب العتيبي · 12-Aug-2008, 02:22 AM

صح لسانك

والله يغني المسلمين ويرفع عنهم بلاهم

والله لايجعل حاجاتنا عند البشر

وننتظر المزيد وحاول تطلع على طريقة تنسيق القصيده اعلاااااا

في المواضيع المثبته

التوقيع