معجب العتيبي
سلام تسليمتن فيها النفل والعبير=للصاحب اللي نويت الليله استنطقه
الكبتن اللي قبل مده ذبحله بعير=مدري سواته زعل والا نواه صدقه
كبتن عتيبه
يامرحبا والسوالف بيننا تستدير=الليل هذّب علومك والحجاج أطلقه!!
اليا ذبحنا الجمل من باب خيره وخير=واليا لقينا جمل ثاني يبا يلحقه!!
معجب العتيبي
والله يا الاول ياكبتن لو حصل له مطير=ماينتظر لين قدام العرب تسلقه
لكنّ ابا اوصيك بالثاني ووضعه خطير =لاجاك ياصاحبي لابد ماتحرقه
كبتن عتيبه
ترى الصعب نقدر نقوده بسلك الحرير=والين حتى هبوب الريح ماتسبقه!!
وترى الخشونه سمه للبدو والبدو غير=علمّ بها اللّي يذوق الزاد بالملعقه!!
معجب العتيبي
اثر الكبير القديم موكلٍ له كبير=وانا احسب ان الوكاله ياعرب مغلقه
علمي بواد الرشا وانته بواد الجرير=حقايقٍ ياعميل الخير وموثقه
كبتن عتيبه
نبى نعلّمك فرق المجمعه عن سدير=حتى يامعجب تفرّق في هل المنطقه!!
واللي بوقت الشدايد مايخيل الصفير=اليوم حط اله قصر وكسّر الصندقه!!
معجب العتيبي
الفرق واضح مابين الراجحي والحكير=حتيش لو راجحي وامواله معلقه
مابي سياسة تمسكن لين تصبح مدير=ابغى سياستك يالنازي على المحرقه
كبتن عتيبه
اللّوح فوقه مساميرٍ تشوق النظير=وشكر المسامير يامعجب على المطرقه!!
والطير لاصار اله جنحان يقدر يطير=وسياستي كل طيرٍ خالقه يرزقه!!
معجب العتيبي
تستسهل الصعب ناسٍ همها فالشخير=والرجل ماوصّله غير التعب وعرقه
اقول هاك الفقار يقول هات الفطير=يالربع وش منطقي يالربع وش منطقه..؟
« آخـــر الـــمـــشـــاركــــات »
31-Aug-2008, 08:04 AM
العرض العادي
