البنت قولولها

[معجب العتيبي]

النشمي

يامعجب الطائره بين السماء والسحاب= شوف السماء فوقها والسحب من دونها
البنت قولولها لا عاد تلبس حجاب= دام العرب كلهم حبو يشوفونها

معجب العتيبي

مدامها ياوسيع العرف فوق الضباب=يصعب على الناس يابن الناس يلقونها
الشرع بيّن لنا درب الخطا والصواب=وناسٍ تلد العيون نكحل عيونها

النشمي

الراس شايب وانا ياخوك توي شباب= والروح مالومها لو باح مكنونها
اليا مشينى على السنه ونهج الكتاب= جابولنا عولمتهم مايريدونها

معجب العتيبي

ان كان مكسبك فالدنيا طعام وشراب=ان كبرت السالفه ماقلت ياهونها
ريش الغرانيق لو تخلط بريش الغراب=للأوله لونها ولثانيه لونها

النشمي

الي يبون الفضيحه جعلهم للذهاب= هذولي الناس قلي وش تسمونها
والله ما من وراهم غير شين وخراب= وعلاهم اللعنه اللي يستحقونها

معجب العتيبي

اللي يحب السوالف في ظهور الغياب=يولع الجمره الحمرا بغليونها
تبين سود القلوب اللي عليها الثياب=لو حاولوا بالثياب البيض يخفونها

النشمي

انا عطيتك سوال ولا لقيت الجواب= يالي تعذبت مع ليلى ومجنونها
خل البساط احمدي وشعب مع اهل الركاب= وعط العرب حسب مذهبها وقانونها

معجب العتيبي

ياللي تعاتب ترا ماهيب حزة عتاب=امانةٍ تحتويها كف مامونها
اعز نفسي كرامه ياعزيز الجناب=واهل الخساسه تعيش الوقت بغبونها

النشمي

انته من اللي يحلون الامور الصعاب= مار السفينه بلاها في دركسونها
البنت جابولها لبساَ قصير ونقاب= ماباقي الا ملابسها يشيلونها

معجب العتيبي

حاسب ضميرك قبل يوم البعث والحساب=والناس بالمخطيه لاعاد ترمونها
غض البصر واحتسب بالمغفره والثواب=والا احتم البنت لاكدت لك قرونها

التوقيع