رفيع المنزل
شعاركم ياعتيبة مثل دبي الجراد= والكل عن صاحبه مايختلف منهجه
عسى حبيب على المرقاب يفتح مزاد= من شان ذا يدخله من شان ذايخرجه
معجب العتيبي
بعض العرب منشبٍ عمره وكنه قراد=لاشاف ربعي على حسن العمل تتجه
مطلبك ماهوب غالي ياقليل العتاد=لكن فكرتك هاذي كنها محرجه
رفيع المنزل
الناس مايزعلون من الكلام الوكاد=والدبلجه ماتفيد مسوي الدبلجه
فكره تخاف انها تطردك عن كل ماد=وانته على حصانك اللي دايم ٍ مسرجه
معجب العتيبي
افضل طريقة نجاح..النصح فالانتقاد=والمشكله فالعمل لازادت البهرجه
ماينحكم بالخساره غير يوم الحصاد=في وقتها راعي الحجه ترا نفلجه
رفيع المنزل
ماشاء الله اثرك عليم ٍ في نوايا الفواد=الرجل بالهرج يبصر قبل مايهرجه
لون البياض اعرفه ماهو بمثل السواد=قلت الحقيقه ولو بعض العرب تزعجه
معجب العتيبي
ياصاحبي لاتدريبيها يامال الهجاد=قلّتك جابت لنا جمله مهي مدرجه
الظاهر انك تجيب العيد قبل العياد=الدرب لاصار صعب..ابعد ولا تنهجه
رفيع المنزل
الطيب اللي يفيد الناس والا استفاد= ومن لايميز بمدخاله جهل مخرجه
الظاهر انك تجيب الهرج من كل واد= يامصنع ماكسبنا الفود من منتجه
معجب العتيبي
الطيّب اللي دعا للنفس وقت الرقاد=وفي سلم المجد يرقا كل حين درجه
ماجيت ادور شهاده منك والا اعتماد=ياواحدٍ من ضروف الوقت فيك عرجه
رفيع المنزل
الله ييسر لنا طرق الهدى والرشاد= والنفس من طاعها بين العرب تسمجه
اللي سمع لك يقول يقود ماهو يقاد= مايدري انك حياتك كل ابوها دوجه
معجب العتيبي
مدام تطلب عظيم الشان رب العباد=همك يزيله وضيق النفس لك يفرجه
ماعاد باقي عليك الا السهر والرقاد=صارت حياتك من الثنتين ذي مدمجه
« آخـــر الـــمـــشـــاركــــات »
14-Aug-2008, 02:44 AM
العرض المتطور
