انتهت حلو الليالي ....

[راع العلطا]

المشاركة الأصلية كتبت بواسطة مرزوق حمدان العتيبي

...
كيف حالكم كلكم ؟
ماهيب جديده ... ولكن اعتقد انها لم تنشر هنا ...

انتهت حلو الليالي والغلا ولاّ ربيعه = طاح قدرك من عيوني مستحيل اترجعينه
الحقيقه ما عملتي صار لي اكبر فجيعه= ليه كل اللي بنيته.. في دقايق تهدمينه
صادق ٍ لك بالمحبه واشتري حبتس ما ابيعه =ماتوقعت ان ودّي بالسهوله تجحدينه !!
وش خطاي اللي عملته لجل احصل هالقطيعه =هل جزاء من شال حبك بالخداع اتعاملينه؟
كنت احسبك صادقه ماتعشقين الا الطليعه =كنت احسب ان العلاقه بيننا تبقى متينه
كنت احسب انك وفيّه نظرتك نظره بديعه = لين بالوقت اكتشفتك وظهرت منك الغبينه
التطبع في الحقيقه مايقاوم للطبيعه = وانتي طبعك بالتلاعب يغلبك ماتغلبينه
ودك بتقطيع قلبي مير ماانتي مستطيعه = يوم غيري قدم عيني في كلامك تمدحينه
حطي نفسك في مكاني وانظري نظره وسيعه = العقل واجب عليك بهالامور اتحكمينه
جيتي لقلبي سريعه غادري وانتي سريعه = والله اعلم من طرالك في هواك اتغربلينه
احمد الله واشكره نفسي ترى نفس ٍ رفيعه = من نقض عهد الموده يبتعد ديني ودينه
دام من دونك جعلتي لي متاريس ٍمنيعه = دربك اللي تعشقينه واصلي لاتقطعينه
والله ان الغش مايرضاه عقل ولا شريعه = ودام هذا هو شعورك فالهدف ماتاصلينه
من خدع غيره ترى لازم يسوّاله خديعه = الكلام اللي كتبته لازم انك تفهمينه
انتهى عهد الموده والغلا ولاّ ربيعه = طاح قدرك من عيوني مستحيل اترجعينه

نصر شعري فاخر كـ صاحبه


صح لسانك×صح لسانك ×صح لسانك..عددحروفهاا

لله درك كثر من هالنصوص يالهواوي