عبدالرزاق القشعمي
سلام مني على اللي يستحق السلام = والآدمي مايجازى كود قدر عمله
النور يا اصحابنا العتبان يجلى الظلام = واللي برك للحمل ملزوم هو يحمله
معجب العتيبي
يامرحبا من هجوسي قبل كل الكلام=باللي يسلم وحق الناس مايجهله
مادمت للحق عارف هاتها بالنظام=واحذر توخر عن المقصود قيس انمله
عبدالرزاق القشعمي
دام البقا يالعتيبي واحتزم بالحزام = ودي اناقشك يارجال في مسأله
وشلون بعض العرب يتقلدون الوسام = وان جيت للحق يارجال ماهوب اله
معجب العتيبي
القاضي اللي حكم عداه كل الملام=وينزل الناس كل انسان في منزله
والشعب واحد من الشايب لحد الغلام=وان كان عندك معارض للعتيبي قله
عبدالرزاق القشعمي
اللي حكم دون علم ٍ - ذا حلال او حرام = والرب يمهل ترى للعبد مايهمله
بالله دقق ترى الوجهه يقولون شام = ماودي ارجع على الموضوع من اوله
معجب العتيبي
يعجبني الطرح بالتحديد والاحترام=والحق للي سمع يافلان مايزعله
لكن رمي الهوا بالبندقه والسهام=يدوش ويصبح حديث الناس في مهزله
عبدالرزاق القشعمي
هذا ترى القصد مانبغى كثير الخصام = وان كنت قادر تعدّل بالمسار اعدله
اقولها وانت ابوها قدّها بالتمام = ما ودنا ياعميل الخير بالبلبله
« آخـــر الـــمـــشـــاركــــات »
30-Apr-2008, 07:39 PM
العرض المتطور
