ناصر الجلاه
الليل يامعجب وأنا وياك في حدود النظام=مادمت شاعر تفهم المقصود .. والساري سرى
أرفع : شعار الطيب يومنه مع العالم يسام=وأهل : النقاده كسبها المنقود .. والساري سرى
معجب العتيبي
يابركها ساعه تجيبك لو تجاوزت السلام=والسالفه فيها قضا وحدود... والساري سرى
ارفع شعارك ياعميلي دام علقت الوسام=والعلم هات العلم يامسعود... والساري سرى
ناصر الجلاه
الله يبارك فيك مار السالفه شد الحزام=وانته تعرف إن الهدف مرصود .. والساري سرى
ام الدواهي لبست الختم وفالخشم الزمام=واللي حسدها في عيونه عود .. والساري سرى
معجب العتيبي
ان كان هذا علمك الليله ياناصر ماتلام=اجل تجاوز بابه المصدود..والساري سرى
ام الدواهي من سرا في دربها ينسى المنام=والا يبا يحسب من اهل العود..والساري سرى
ناصر الجلاه
ماني معديها من حدود الحلال أليا الحرام=لو كانها تنطح هبوب النود .. والساري سرى
ياطيبها تصلخ وتطبخ شوق من حب وهيام=مار البرى من دونها مردود .. والساري سرى
معجب العتيبي
كلمتك هذي حق لكن وش وراها من كلام=وانته عليك البذل والمجهود.. والساري سرى
انته تمناها وتحسبها مثل طير الحمام=تقدر تدخلها قفص مسدود..والساري سرى
ناصر الجلاه
الجوج والماجوج يامعجب ترى باقي نيام=اترك دلوخ المسلمين رقود .. والساري سرى
األحاف من صوف الوبر ووساد من ريش النعام=يوم الكريم يجود بالماجود .. والساري سرى
معجب العتيبي
لاتبحث الفتنه وخل الوضع ياناصر تمام=دفن الفتن ياصاحبي محمود..والساري سرى
من نام في همه يانصار يبشر بزود الحلام=ومايصبر اللي واحدٍ محدود..والساري سرى
ناصر الجلاه
الطق يا معجب يقولون العرب فك اللحام=وانته عصيت العلم قمت تزود .. والساري سرى
الدرب واضح يالعتيبي واعرف إن الدرب شام=مامقتفيك ألا اللحد والدود .. والساري سرى
معجب العتيبي
اللي صبر فالدرب ياناصر وصل رغم الزحام=والوقت بسنين العمر معدود... والساري سرى
ياصاحبي خل البصل لاتاكله عقب الصيام=ترا الليال البيض ماهي سود..والساري سرى
ناصر الجلاه
الصبر لو إنه بحر يميده جف من الكرام=اللي تثبت قولها بشهود .. والساري سرى
السبت قدام الاحد لو الاحد بعده تمام=يعني يامعجب قدها وقدود .. ههه والساري سرى
معجب العتيبي
لاتحسب الموضوع يارجال فزعه وانتقام=الوضع فيه سهود بعد مهود..والساري سرى
الجو يصبح صحو بعد العاصفه والا الغمام=مابعد سيل الماء ياكود ركود..والساري سرى
ناصر الحلاه
ضرب المعاني ياولد ماهو كما ضرب السهـام=تبغى الصحيح ألا يغث كبود .. والساري سرى
يوم التمر بالصاع يوزن والذهب وزنه جـرام=بالله سلم لي على أهل الذود .. والساري سرى
معجب العتيبي
تال الزمن راع الخطام ايفك من يده الخطـام=حتى ولو انه معه معقود..والسـاري سـرى
قارنت بين الملح والسكـر ونلحقـك المـلام=وافكارك اصبح يعتليها شرود..والساري سرى
« آخـــر الـــمـــشـــاركــــات »
14-Mar-2008, 12:24 AM
العرض الشجري