المرجلة ..عزم و جزم وفعايل

[الجمل العدواني]

فكـرت بالدنيـا وبرّقـت بالحـال= وقلّبتهـا مابيـن عـدلٍ ومـايـل
جلست أفكـر وأتفكـر بالاحـوال= أجمـع وأفـرّق دقهّـا والجلايـل
في ساعةٍ مافيه من حولـي أزوال =إلا أنـا والنـار تشعـل شعـايـل
مركي على جال الجمر خمسة إدلال= يقدح سناها مثـل بـرق المخايـل
وأخذت لي منهن على الكيف فنجال= يجلي همومٍ وسط فكـري تشايـل
في صحصح ٍ مافيه حاسد وعـذّال= أهل القلـوب المبغضـات الغلايـل
في صحصح ٍ يطرد على بيده ألال= قفرٍ خـلا مافيـه غيـر الهمايـل
أخذت أراجع ماعرفته مـن أمثـال= ماضي العلـوم موثّقـات الدلايـل
لقيت في دنيـاي مايزعـج البـال= ممّا يريب النفس شفـت الهوايـل
سنّدت برقا نايف الرجـم والجـال= وزلت قدم رجلي برجـف وتهايـل
وطيتها شعبـان وحـزوم وجبـال= وسرّيتها مسري وصبـح وقوايـل
خاويت أنا رجال من الناس ورجال= ومال الرّخم ماكر على رأس طايل
شفت الحصاني تعتلي روس الاقذال= والذيب يمشـي يتقّـي بالمسايـل
والبوم له ماكر على رأس ما طال= والحر ينزل بيـن قشـع وخمايـل
ضاعت مفاهيمٍِ عريضات وطـوال= فيها أختلف درب السنع والوسايـل
دنيا غريبة ماعرفنا لهـا أشكـال =منها لبيب العقـل شـاف العلايـل
دنيا تقلّب بيـن الاقفـاي وأقبـال= ضاعت بها الحسبة بكل المسايـل
كلّ غـدى للحـق ناقـض وفتّـال= من يوم صارت هرج قيل ٍ وقايـل
حتى الكرم شبّه مع الناس بخبـال =والحق عند النـاس عدلـه تمايـل
منها نشف حالي غدى كنه اخـلال= هذي عظامي تحت ثوبـي نحايـل
ماكل من يلبس له اعقـال رجـال= ولا كل عسّافٍ يعسّـف الاصايـل
المرجلة ما هي سواليّـف دجّـال =المرجلـة جـزمٍ وعـزم وفعايـل
والشور مايؤخذ من عقول جهّـال= والحـق مايقبـل عليـه البدايـل
أصد وجهي عن بعض شوف الانذال= وأقبل على راعي الوفا والجمايـل
ماعاد لي رغبة ولا عنـدي اّمـال =ولأني من اللي للردى هـد عايـل
لي رغبة وحده سجـود بالاصـال= اخّط لي مسجـد وأصلـي نفايـل

للشاعر \ نايف بن مهنا الصهيبي العدواني