بديوي الوقداني

[الحدب]

اسمحلي يا فارس عتيبة وانا أخوك في تنسيق القصيدة

أيـامنـا والليالـي كم نعاتبها = شبنا وشابت وعفنا بعض الاحوالي
تاعد مواعيد والجاهـل مكذبها = واللي عرف حدّها من همها سالي
إن اقبلت يوم ما تصفي مشاربـها = تقفي وتقبـل وما دامت على حالي
فـي كـل يوم ٍ تورينا عجايبها = واليوم الاول تراه أحسن من التالي
أيـام فـي غلبها وايـام نغلبها = وايـام فيها سـوا والدهـر ميّالي
جربت الايام ،مثلي مـن يجربـها = تـجريب عاقـل وذاق المر والحالي
نضحك مع الناس والدنيا نلاعبها = نمشي مع الفي طوع ٍ حيث ما مالي
كم من علوم ٍ وكم آداب نكسبها = والشعـر مـازون مثقـال ٍ بمثقالي
أعرف حروف الهجا بالرمز واكتبها = عـاقل ومجنون حاوي كل الاشكالي
لكنّ حظي ردي والـروح متعبها = ما فادنـي حسن تأديـبي مع امثالي
إن جيت أبي حاجة ٍ عزت مطالبها = العفـو ما واحد ٍ في الناس يا والي
قوم ٍ إلى جيتهم رفـّت شواربـها = بالضحـك وقلوبها فيها الردا كالي
وقوم ٍ إلـى جيتها صكّت حواجبها = وابدت لي البغض في مقفاي واقبالي
ما كنـّي إلا مسوي حال مغضبها = والكل فـي عشرتـه ماكر ودجّالي
يا حيف ! تخفي أمورٍ كنت حاسبها = واللي علـى بالهم كلـه على بالـي
الجـار جافي وكم قـومٍ محاربـها = والأهل واصحابنا والدون والعالـي
والروح وش عذرها في تـرك واجبها = راح الحسب والنسب في جمع الاموالي
نفسي تـبي العز والحاجات تغصبها = ترمي بـها بـين أجاويـد وانـذالي
المال يحيي عظام ٍ لا حيـاة ابـها = كالسيل يـحيي الهشيم الدمدم البالي
عفت المنازل وروحي يـوم اجنـّبها = منها غنيمـة وعنها البعد أولى لـي
لا خير في ديرة ٍ يشقى العزيز ابـها = يـمشي مع الناس فـي همٍ وإذلالي
دارٍ بـها الخوف دومٍ ما يغايـبها = والجوع فيها ومعها بـعض الاحوالي
جـوعى سراحينها شبعـى ثعاليها = الكلـب والـهر يقدم كل ريبالي
عز الفتى راس مالـه من مكاسبها = يا مرتضي الهون لا عـزٍ ولا مـالي
ذللت بالروح ليـن ارخصت جانبها = وانا عتيـبي عريب الجد والخـالي
قومٍ تدوس الأفاعـي مع عقاربـها = ولها عزايـم تـهدّ الشامـخ العالي
خـل المنازل وقـل للبـين يندبها = يـبكي عليها بدمع العين هطـالي
لا تعمر الدار والقـالات تخربـها = بـيع الردي بالخسارة واشـتر الغالي
ما ضاقت الأرض وانسدت مذاهبها = فيها السعـة والمراجـل والتفّـتالي
دارٍ بـدار وجـيـرانٍ نقاربـهـا = وأرضٍ بـأرض وأطـلال ٍ بأطـلالي
والناس اجانيب لين انك تصاحبـها = تكـون منهـم كمـا قالوا بالامثالي
الأرض لله نـمشي فـي مناكبهـا = والله قـدّر لـنـا أرزاق وآجـالي
حث المطايا وشـرّقهـا وغرّبـها = واقطع بـها كـل فج ٍ دارس ٍ خالي
واطعـن نـحور الفيافي فـي ترايبها = وابعـد عن الهم تـمسي خالي البالي
فـي كـل عمليـّةٍ تقطـع براكبها = فـدافد البـيد درهـام ٍ وزرفـالي
تبعدك عن دار قـوم ودارٍ تقـرّبـها = واختـر لنفسك للمنـزال منـزالي
لـو مت فـي ديرةٍ يجفاك صاحبها = كم ذا الـجفا والتجافـي والتـّعلالي
دوس المخاطـر ولا تـخشى عواقبها = الموت واحـد وبعـد العـز يـجلالي
إن المنـايـا إذا مـدّت مـخالبها = تـدركّ لـو كنت في جو السما العالي
مـا قـرّت الأسد فـي عالي مراقبها = تسعى على الرزق ما حنـّت للاشبالي
والشمس في برجها والغيـم يحجبها = تـقفي وتقبـل لها فـي الفلك مجدالي

وأشكرك
على الطرح

أخوك
((( الحــــدب )))