مقتل تركي بن حميد .. مصدر موثق ...

[عريف ركن]

حي الله ابن مكرز


انشاء الله لا انا ولا انتم من اللي يكذبون


اللي قالي السالفة طال عمرك يقاله مطلق بن نايف البراق


من الرياض والظاهر انهم قبل كانوا في الشرقية


ولو تبي تنشد تبي تلقى كثير من عتيبه يقولون نفس الكلام


واكثر منهم يقولون روايتك انت


حتى مطير مختلفين في اللي ذبح تركي


منهم من يقول مبلش بن جبرين ومنهم من يقول الشريف


والاغلبية يقولون صنهات بن حريش






لكن انا استفساري محدد وواضح ووالله العظيم اني ما اقصد من وراه اي شي


استفساري عن المطيري اللي كسر سنون تركي


وبعضهم يقول كسر راسه وشلون تقولون بعد موت ابن حميد بسنه


او اكثر ؟؟؟


ما دامه مات عندكم وفي دياركم صعب يجي اي واحد ويكسر سنونه


انا هذا قصدي





واحب اعلمك يابن مكرز ولا يهونون الجميع ان الامور هذي اكره شي عندي


الواحد يقول سوينا وفعلنا ويرد الثاني عليه حنا فعلنا وسوينا


والله ثم والله ماراح تفيدنا لا دنيا ولا آخره


وقت الفخر بها السوالف راح وولى


واليوم الفخر باللي ينفع امته ودينه ووطنه والناس معروف اصلها وفصلها


واللي ذبح تركي بن حميد تحسبه يبي يدخل الجنه بسبب فعلته ؟؟؟


هذا دم مسلم يبي يحاسب عنه فما بالك اذا كان هالشخص من الصالحين


واهل التدين والتوحيد نحسب الشيخ تركي كذالك والله حسيبه


وما نزكي على الله احد




يعني زبدة الكلام يالربع ان الامور هذي امور القبيلة ما نعطيها اكبر من حجمها


وفي نفس الوقت ما نسمح بالتدليس على القبيلة ايا كانت هذي القبيلة




ووالله العظيم اني اجلس مع شياب الله يطول عمارهم من مطير وعتيبه ويعرفون


هذي السوالف زين وبعضهم يمكن عاصرها او عاصر ناس عاصروها


الا ان مجالسهم ما فيها غير ذكر الله والسوالف الزينه اللي كلنا نستفيد منها


مثل حق الجيرة والامانه والعفه ويستشهدون بقصايد تركي بن حميد


وشرواه من اهل العقل الراجح


لأن هؤلاء الرجال قولهم وفعلهم كله حكم



وآسف على الاطاله وشكرا لكم