ابراهيم الجـــــذع
وينك يا أبو سلطان عن صفق الأمواج=يوم البحر يصفق على الجال موجه
حطيت دون الباب قفلٍ ومزلاج=وامن البخل مالك بقا في دروجه
معجب العتيبي
المصطفى ياصاحبي حط منهاج= للمسلم بفعله ودقة هروجه
بابٍ يجيب الريح ويسبب احراج=نكره دخوله قبل نكره خروجه
ابراهيم الجـــــذع
صحيح مير الكبر ما منه مخراج=كن الرياض اليوم تملك بروجه
ما لك ومال اللي عن الدرب منعاج=ترا البلد قدمك وساعٍ فجوجه
معجب العتيبي
هذاك من نارٍ تلظى ماهو ناج=ودربٍ يوديله ترا ماندوجه
صحيح لكن بعدنا يمكن علاج=والجسم من عدوا المرض وش يحوجه
ابراهيم الجـــــذع
الصدق يدبل خاطري بعض الأنتاج=خصٍ ليا شفت الصحاف وعلوجه
مير البلا حرٍ ليا ابطا ولا راج=يبا يروح امن الطيور المروجه
معجب العتيبي
لاجيت مكه شفت زاير وحجاج=والكل منهم جاب زينه وعوجه
لاصرت يابراهيم في جنب هداج=لاتنشد (ا) عن اللي تزايد هموجه
ابراهيم الجـــــذع
الحب مثل النار والشوق وهاج=وأنا بلاي امن الفتاه الغنوجه
وأنته بعينك شفت ما عاد يحتاج=القيض راس الضلع كسر ثلوجه
معجب العتيبي
اللي يحب يحطله بيت وسراج=ويقدم اصناف الذهب مع ولوجه
والا يعيش (ا)مع المخاليق دواج=ماضن يلقى باقي العمر زوجه
« آخـــر الـــمـــشـــاركــــات »
08-Oct-2010, 06:36 AM
العرض المتطور
