من عين الشاعر اللي كل غبه يغوص

[ابراهيم الجـــــذع]

اعرف طيور الهوى واعرف طيور القفوص=واعرف جميع السلع فالسوق واسعارها
يا صاحبي لا تضيع فالخرز والفصوص=ما يطلع اللولؤ الا بطن محارها

[خوي السعد]

الماء يزيد الحجر قوه بعكس الجصوص = اللي لاجاها المطر حتت من اجدارها
راجع حسابك وانا خابرك رجل (ن) بخوص = لاتجعل الناس صوبك تلفت انظارها

[احمد حامد الزايدي]

الله الله


محاوره رائعه


صحت السنتكم ياشعار

[خوي السعد]

صح بدنك يالغالي نورتنا

[ابراهيم الجـــــذع]

لا تحسبنك غفصت القوم وانت مغفوص=والمعركه من قعيدتها و سبارها
منته مخلص ديون ولاش منها خلوص=مادام جاتك علومٍ منت بيطارها

[خوي السعد]

اذهن لرجلك لاتقرب حول صل (ن) قروص = وتحط في حفرة (ن) مامات حفارها
كنت احسب انك بطل واثرك رجل(ن)ملوص = بدل بعيشتك هذي عيشة (ن) غارها

[ابراهيم الجـــــذع]

ترى بليس العور يطرب لرقص الرقوص=والداب مات وبليس ادياركم زارها
انت تحملت حملٍٍ بينته الفحوص=لكن شاور رجالاً ينفعك شارها

[خوي السعد]

مادام فيك انحراف وضاري (ن) بالرصوص = بنرصك الرصه اللي تشكي اضرارها
كنت احسب انك فرخ شيهان واثرك صوص = يابلشت الناس بالعاره وعيارها

[ابراهيم الجـــــذع]

العرن مايفرصه ياكود فرص الفروص=ما ثبت اللوحه الا راس مسمارها
من يوم راحت علوم ارباع مدري نصوص=لا عاد تنطح رجالاً طالت اشبارها

[خوي السعد]

مادام لوحتك مخروقه وعشتك خوص = الله يخلف على بدلتك وزرارها
كنت احسب انك على جزل المعاني حروص = واثرك حطاب ليل وخاب مشوارها