سفر الدغيلبي محمد بن متروك

[المثالي]

محمد السناني

سلام الله سلام لمن حضر نابع من الاعماق
يخص عتيبه الهيلا بحاضرها وغايبها
نبشرنا سفر في علم لا يعقل ولا ينطاق
لكن اقول اله هاذي البشاره ليش جايبها

سفر الدغيلبي

هلا يا مرحبا ترحيبة ٍ تكتب على الاوراق
وتبقى جسر ثابت بين قاريها وكاتبها
انا خلت المحخايل واعجبتني لمعة البراق
وباقي علومها لامنها هلت سحايبها

محمد السناني

ليا وصلتها تسلم ولن وخرت حث الساق
نطقت الكلمه اللي ما انت داري عن عواقبها
ليا بليت راسك لا تقول شويش يا حلاق
تحمل ما تسوي شفرته والا تجنبها

سفر

ليا هالحين يالجهنان والبندق على المعلاق
يقوله واحد ٍ لاشالها جوّد مظاربها
ترا الشفره لراس ٍ ما يحفظ العهد والميثاق
وحنا روسنا هرج المعذرب ما يعذربها

السناني

كبيره هقوتك والمرجله كل ٍ لها عشاق
لكن هذا يناسبها وهذا ما يناسبها
هذا سرٍ دفين وعالم ٍ به ربنا الخلاق
تحسب انك مخضرم للقبيله وانت ناكبها

سفر

اظنك ناقة عريمان لاتحدى ولا تنساق
وحتى لو نحط شدادها من فوق غاربها
لو ان الرزق في يدين المعادي قطعت الارزاق
ولكن غير حلق دقونها حلقت شواربها

السناني

اظنك ما تحكم في لساانك يوم صدرك ضاق
يا ليت الكلمه اللي تنتقص قدرك تغص بها
ليا جاك الطبق ساخن بلاش تبدل الاطباق
مصيبه ما تحس بجورها حتى تجربها

سفر

الاولى يا محمد ناخذ العالم بحسن اخلاق
والاخرى نعزل الروس الشريره عن مناكبها
سفينتنا مشت فوق البحور وساقها السواق
تبى تاصل لو ان الموج يصفق في جوانبها

السناني

عليك اثباتها والليله انته في محل اسباق
حسب قول المثل من خاف من عله يموت ابها

[الصقيل]

لاهنت ياالمثالي وصح لسان شاعر جهينه وسفر الدغيلبي
:::::::::::::::::::::::::::::::::::::::::::::::::: ::::::::::

آخر تعديل الصقيل يوم 13-Jun-2010 في 04:41 AM.

[حسن إبراهيم الدجيماء]

ليا هالحين يالجهنان والبندق على المعلاق = يقوله واحد ٍ لاشالها جوّد مظاربها

,,

أنا اشهد والله
,,
سفر والسناني
,,
عمالقة ماشاء الله تبارك الرحمن
,,
مشكور يالمثالي
,,
وكثّر الله من أمثالك ياشحيمااان
,,
إحتراامي

,,

[ابن المحايا]

جنيهة الذهب وسفر


مبدعين ماشاء الله عليهم


والواضح من سياق المحاورة ان السناني


يتشره (على كلمة قالها شخص يمكن يكون سفر ويمكن يكون غيره )


والبيت الاخير واضح اللي يقول فيه


عليك اثباتها والليله انته في محل اسباق *** حسب قول المثل من خاف من عله يموت ابها

سؤالي للمبدع المثالي متى تاريخ هذه المحاورة ؟؟


ولاهنت على التميز الملحوظ يالغالي

آخر تعديل ابن المحايا يوم 13-Jun-2010 في 11:08 AM.

[المثالي]

الله يحيكم جميعا


اما المعنى اتوقع واالله اعلم انه سياسي وقوي


والمحاورة كانت فالصيف الماضي ولاادري في اي شهر

[ابن المحايا]

المشاركة الأصلية كتبت بواسطة المثالي

الله يحيكم جميعا


اما المعنى اتوقع واالله اعلم انه سياسي وقوي


والمحاورة كانت فالصيف الماضي ولاادري في اي شهر

يمكن يكون سياسي ويمكن لا


بس المشكلة لو كان المقصد سيلسي ان الاحداث السياسية بعضها ماترسخ ويكون لها وقت محدد وينسونها الناس


يعني لو نزلت المحاورة في وقتها يمكن عرفنا وش يقصدون لكن الحين المده سنه كاملة ومن المستحيل ان نعرف وش الحدث


المقصود


تحياتي

آخر تعديل ابن المحايا يوم 13-Jun-2010 في 11:38 AM.

[منيرالروقي]

أن صارالمعنى سياسي وان صار غير _ أشهد بالله إن سفرالدغيلبي مجملنا في كل موقف _ وشكرا لابن متروك وشكرا للمثالي