حبيب العازمي.....................حزام العصيمي(رائعه)

[عبدالملك القاضي]

محاوره اعجبتني بين لحنها ومعناها بين حبيب العازمي وحزام العصيمي
ولازلت اقول حبيب يغرد خارج السرب وليس له منافس في الوقت الحالي..وحزام مبدع في هذا القاف.

حبيب العازمي
هلا يامرحبا لاهنت ياصقلان بن مرزوق................وفيت واجب الضيفان والجيران كملته
عساها عادة ماتختلف ياعزوتي ياروق..................وانا ماقول قول إلا يشرفني ليا قلته
حزام العصيمي
يدوم الك البقى ياشاعر الي منزلك مرموق..........تجمل صاحب الحفله يبو فيصل وجملته
عساها عادة تبقى وترقا للثريا فوق.....................وانا لاقلت علم يحمل الهقوه تحملته
حبيب العازمي
عليك بروق وإلا يالعصيمي ماعليك بروق.............مادام ان المخايل مابقى دارن ماسيلته
انا لو كان ادور للبضايع ماهبطت السوق.............لكنه صار مشوار تناولني تناولته
حزام العصيمي
انا لي لحق في رقاب العرب وايظا علي حقوق........واعامل كل مطنوخ تشرفني معاملته
انا خابرك تاجر والجواهر داخل الصندوق.............لكن السيف لو حاجته بالحرب ماشلته
حبيب العازمي
رسومك باقيه بارض الكنانه يالملك فاروق.......... وحنا ماننزل كل رجل غير منزلته
ترى مافيه قلب نابض دمه بدون عروق...............وغير العقل مايعقل على الرجال مرجلته
حزام العصيمي
تبا تبقى رسومي بالكنانه والحياه وفوق..............عسى ربي يبارك بالرسوم الي ممثلته
مادام انا بخير ونعرف الصاحي من المطفوق........مانسمع هرجة الي صكة الدنيا مغربلته
حبيب العازمي
تحرينا على الشاشه يصرح مصدرن موثوق............لكن مع الاسف قال الشعوب العوب منفلته
تبى تمشي مع الصحراء وتشرب من حليب النوق.......هذا كان البعير شعيل درهم بك ماعقلته
حزام العصيمي
تحريت الخبر مار الخزينه بابها مغلوق...............وانا ماادري من الي يده ياحبيب مقفلته
قضيتنا درسناها وجبنا ختمها المسروق................ومن يبغى يقابلني على الاثبات قابلته