مرثية الشاعر اللواء ركن / عويض بن سعد الجعيد في أبن عمه محمد بم مطلق الجعيد

[مستور الجعيد]

السلام عليكم ورحمة الله وبركاته

هذه مرثية للشاعر اللواء ركن / عويض بن سعد بن فاتن الجعيد في أبن عمه المرحوم بإذن الله
تعالى والذي وافاه الأجل المحتوم يوم السبت 04/01/1432 هـ بمحافظة الدوادمي ،،،،




ياليتني مافتحت العصر جوالي
ولاقريت الرساله وش كتب فيها


يالله يالله يامعبود ياوالـــي
يامالك الملك ياعالم خوافيها


تفرج لقلب تلقى المخرم الخالي
من هول ماشاف باولها وتاليــها


لاوالله الا فقدت الصاحب الغالي
والعين من موقها هلت عباريــها


ياموت اخذته وقلي وش تبقى لي
غير اني اعيش بالذكرى وطاريها


ياكثر ياكثر مايطري على بالي
لاشفتها بالصحن والعود قافيها


كريم سبلا ومدهل كل رجالي
المرجله تفتخر به وهو راعيها


مذكور بالخير بالاول وبالتالي
رجله نزيهه عن الزله مواطيها


محمد اللي لجور الحمل يشتالي
ماحسب حساب بايعها وشاريها


مرحوم يامن تركني عقبه لحالي
ادله النفس من عقبه واسليها


اللي ليا ابطيت ماجيته تحرى لي
وانا بعد جيته مثله متحريـــــــها


اليوم قفى وصار القبر منزالي
في رحمة اللي جنان الخلد يعطيها


الواحد اللي تعلى بالسماء العالي
رب السماوات مرسيها ومجريها


وسع له القبر خله في وظلالي
يارب رحمتك عبدك طامع فيها


ابوك مامات ياحمد عقب عيالي
ارجال مثلك لها الميقاف حاسيها


وعبدالله القرم اخوك وسدك العالي
لاكشرن الليالي عن اشافيها


يالله بنؤ غزير الوبل همالي
على دياربها قبره ويسقيها


حتى نشوف النبات الوان واشكالي
من حبه احبها واحب طاريها


وختامها عد نجم بان وهلالي
صلوا على سيد الامه وهاديها



نســأل الله للفقيد المغفرة والرحمة وأن لايريكم مكروه ،،،

آخر تعديل مستور الجعيد يوم 17-Dec-2010 في 06:04 PM.