عتبان ماقفنا ليا نوخ النوب

[سمران القثامي]

[poet font="Simplified Arabic,4,black,normal,normal" bkcolor="transparent" bkimage="backgrounds/18.gif" border="none,4,gray" type=0 line=200% align=center use=ex length=0 char="" num="0,black" filter=""]
عشنا على طيب المكارم والافعال=عتبان ماقفنا ليا نوخ النوب
احرار ما نقبل من الذل مثقال=ونكسب بياض الوجه والسمر مشبوب
لطامة العايل على كل مرمال =ذباحة الحايل فرج كل مكروب
كسابة الفعل النقي ذخر الابطال=يوم الليالي خوف ومداحم جنوب
ترعى بنا الوضحاءزماليق الاسهال =ويوم الوعد نوفي لياغاب عرقوب
قلته وطيب الفعل شاهد ولازال=عتيبي وقدري مع هل القدر محسوب
اقلط ولي في مجلس الفخر فنجال= كيف يفضل لي على كل مشروب
واختار مجلاس به الهم ينزال=وابعد خطى الاقدام عن كل عذروب
وادهل مع اهل الطيب في كل مدهال=غريزة فالنفس عنها ولااتوب
وارفع مقامي عن رديين الاعمال=خوف من الله لاانجبر واكسب ذنوب
وابعد مجالي عن هل القيل والقال=ولاني على المجلاس مجبر ومغصوب
ولااغتر فالعالم ولابعض الاشكال=عقلي معي ماني من العقل مسلوب
افحص وادقق فالبشر دق وجلال=واختار للرفقه نداوي ويشبوب
اخاف يلحقني مناقيد واقوال=وابلش بحوق الماء ليا صار مسكوب
الرجل ما يرضى على نفسه اذلال=ولايرتدي للنقص مشلح ولاثوب
وليا رضى الحقران خاسر ولو طال=عمره مع العقال مجفي ومنكوب
الوقت علمنا على اقفاي واقبال=وعشنا فصول الوقت نسمه ولاهوب
فج فسيح ومخرمٍ يطرد لال=وملاعبة قاف على طرق مسحوب
وسج القدم في خايعٍ عقب همال=عندي تساوي مرتبة كل منصوب
لاصار يبعدني عن رخوم وانذال=يا مرحبا بالبعد مشهى ومطلوب
ومن لاخذا من وقته دروس وسوال=بالجهل يلبس ثوبه الزين مقلوب
تجارب يلقى بها كل رجال=الفرق بين الناس ويعيش باسلوب
يقدر العاقل على كل الاحوال=ويصبر على الجاهل مثل صبر يعقوب
قلته وانا لي فالمواضيع مدخال=شاعر ولي فالشعر منهاج ودروب
اشرب قراحه وانتقي شرد الامثال=وتردد اصداها جماهير وقلوب
[/poet]