رفيع المنزل=
ياسلام الله برده تسكـت مطيـر وعتيبـة=واي واحد في دعاويهم مشى سمعا ً وطاعه
روسنا من فوق كل الروس مافيها غريبـه=الغريبة سبنا اللي مدنـا ضعفيـن صاعـه
العمدة=
ردها فالجيب ما دامت على امثالك صعيبـه=من يسكت كاسبين العرف ورموز الشجاعه
لا تقول انك شريك الصيرمي والا نسيبـه=الرمل نعرف نعامه .. والجبل نعرف سباعه
رفيع المنزل=
ويش اسوي فيك وانته نظرة عيونك قريبه=بس كل ٍ مثل ماقال المثل حسب اطلاعـه
انشد التاريخ ياللي ماعرفنا لـك كسيبـه=كود في وقت يذل الحر .. ويعز الرعاعـه
العمدة=
جرحك المزمن تبا تلقى علاجه مع طبيبـه=مير ونّ ايام لين نشوف تقريـر الاشاعـة
ان نشدته قال بعض الناس كانوا في مغيبه=واخر الهجرة بنوا خربوش في حيد الجماعة
رفيع المنزل=
الونين لواحد ٍ نصـاب وجروحـه عطيبـه=والا انا مااقول غير الرجل يشرب من ذراعه
مانشدت الا عتيبـي ٍ كـذوب وفيـه ريبـه=والعتيبي كـل ماضامـوه بلسانـه براعـه
العمدة=
من يموح الدلو بالذرعان ما يربض نصيبه=لا يطول لسانك اللي كان قاصر فالمجاعـه
بينك وبين النجوم اللي لها فالكون هيبـه=المسافة شاسعة والفرق واضح فالبضاعة
رفيع المنزل=
لو يموت اللي حماكم كل ذيب وكل ذيبه=كان قلت الكنز يالعتبان هو كنزالقناعـه
وانت والله يالعريف اللي تجسس للكتيبه=قلهم مامنكم اللي نعتبر ذبحـه طماعـه
العمدة=
المخضرم عاش فالعصرين وان واجه حريبه=جربعه والا نزح من ديرته في ظرف ساعة
كيف ترجح بالجبال الراسية حبـة زبيبـه=فالنحر نطعن وجافين التجسـس واللكاعـه
رفيع المنزل=
التجربع عند شكلك لو تقول انـك صحيبـه=انت رجل ٍ ضيع الليله هجومه من دفاعـه
امدح اللي كل مايسرح يضوي في مصيبـه=كيف تقوى سب رجال ٍ طباعك من طباعه!!
العمدة=
ذاق من كاس المرارة واستلم كـرت الغليبـه=واصبح ابن الناس بين الناس مغسولً شراعه
طبع ذيب مخاوي ذياب وعلى المرقب قنيبـه=يوم بعض الخلق ميت قلب خايـن للوداعـة
رفيع المنزل=
بعد هاذي يارعد بالله جيب اللي تجيبـه=اثر اصابعك الطوال تميز حروف الطباعه
كل طيب لو بهته يعرفون الناس طيبـه=مار انا ماشفت في مرقابكم غير الضباعه
العمدة=
السهوم اللي رميناها على قلـب الضريبـه=مار قولوا يالله الرحمة وعفوك و الشفاعه
القبر فالوادي المسني ومن فوقه نصيبـه=ما وصل راعيه مرقاب الوفا من قصر باعه
الله الله محاورة قووية وراائعه
صح لسااانك يارفيع المنزل
العمدة
جعلني والله مافقد
هالخشم
يابحر يامحيط بأكمله
صح لساااانك مليااااار
لك مني ارقا التحايا واطيبها.
| التوقيع |
اللي على كيفه يجي والاّ على كيفه يروح = إن راح في حفظ الولي وإن جاء هلا واهلآ هلا.
ماني على قربه شفي والاّ على بعده شفوح = الله خلقني مااعترض من صد من كل الملا.
|
« آخـــر الـــمـــشـــاركــــات »
02-Oct-2009, 10:46 AM
العرض العادي
