معجب العتيبي
مرحبا بالرشيدي يوم مر وتعنّا=جيته عندنا تسوا ثلاثين جيّه
شاعر ويفهم الاشعار من كل فنّا=كان وده ندردش يعتبرني خويه
الرشيدي
البقا فيك ياصوتٍ على اللحن غنا=لحن مايتصل بالعود والسمسمية
اعتبرني خويك وانتبه لاتثنا=الفشق في حزامي والرسن في يديه
معجب العتيبي
قبل شهرين مكتوبك وصل في وطنا=كل من شاف حرفه قال وش هالبليه
التثني ماهوب النا.. وخطاكم تثنا=طبعا العفو يارجال والمقدريه
الرشيدي
استلم كل مايصلك مكتوب منا=وانتبه للحروف البينة والخفية
التثني ماهوب الكم ولاهوب لنا=لكن المعركة تنسى بها المرحمية
معجب العتيبي
استلمنا وكلٍ شاف يااابو مهنا=والعرب تدري انا مانحب الخطيه
الكلام ان بدابه صدق لااا ماشحنا=لكن الظلم يارجال ظلم البريه
الرشيدي
يدخل الشك بقليب الضعيف المعنا=كل ماأوحى مذمة قال هذي عليه
يوم صدام في روحه وربعه تجنا=يحسب إنه يبا يحتل نجد العذية
معجب العتيبي
حملتن فوق ظهرك شيلها ياجملنا=مالها عندنا يا صاحبي قابليه
اخذوا العلم منا ردوا العلم عنا=عن حما الفقر ترفعنا النفوس الغنيه
الرشيدي
يامهنا تحاول تدرك اللي تمنا=والعواصيف ماهزت طوارف طمية
الله اللي وهبنا العز من يوم كنا=ماخضعنا لغير الله وسنة نبيه
معجب العتيبي
يالرشيدي لأمانينا وصلنا وطلنا=وانت ماجبت لا هذي ولا جبت ذيه
ماحدٍ شاف ساس بيوتك اللي تبنا=وصمة العار في وجهك من الجاهليه
الرشيدي
أنت معجب واعدك من عجايب زمنا=كم يوديك درب الأمنية للمنية
ردها في صحنك وكفها عن صحنا=قبل أخليك تنقلها صباح وعشية
معجب العتيبي
العجب يوم احدك للطريق وتونا=انت ماتدري ان الحق مافيه زيه..؟
انت دورتها مابين نابٍ وسنا=خلها يالرشيدي وانتبه للوصيه
الرشيدي
حدر اللقمة أم السم جعلك تهنا=يمكن الله يجعلها شفا الباطنية
أنته اللي دنيت الها وحظك تدنا=لا تسب الرجال وعلتك داخلية
معجب العتيبي
دام رمحي رميته في قفاك وتطنا=لازم يبين في نيتك وتصير نيه
مانسب الرجال ولانشوه عملنا=لكن نعلم الغاوي ليا بان غيه
« آخـــر الـــمـــشـــاركــــات »
13-Aug-2008, 03:50 AM
العرض الشجري