سلطان الجـذع
سرى ليل الهجوس اللي سوات الرايح الهتان =خيالٍ بارقه حدري وكل الخير بقنوفه
اعرف المرشدي بندر يعاني من عمى الالوان =ليا جاء فالامور خيار دايم يخدعه شوفه
بندر المرشدي
سرا ليل الخيال وهلّ هماله على سلطان =رشاشة ما يبل إلا شماغ الرجل وكتوفه
أنا عيني تشوف اللي يشوفه سالم الأعيان=وشيءٍ يلزمه مجهر فلا هي فيه مكلوفة
سلطان الجـذع
ليا ارضيت السميري مارضا مرزوق بن حمدان =لكنك لاتجنب عن طريق الحق وتطوفه
مدام انك كذا وش لون حطيت العجاف سمان =تجامل مع هل البصره وتضحك مع هل الكوفه
بندر المرشدي
عميلك غير ربه مايهمه كايناً من كان=ومن يزعل بليا أسباب خله ماهو حسوفه
سعيد في عيون أمه ترا ما يلحقه حقران=ترا كل البضايع داخل الاسواق معروفة
سلطان الجـذع
والا يالمرشدي جددت قصة طير بن برمان =تعبنا معك لو اتعابنا ماهي بمخلوفه
تحسب ان الرخيص من البضايع غالي االاثمان =اثرك الخام مانت بعارف قطنه ولاصوفه
بندر المرشدي
انا بعطيك بيتاً ياوسيع المعرفة مليان=ترا ناسٍ تدفك يمنّا من عصر مدفوفه
تسوقّ سلعةٍ لك خاسرة.. ياشاعر الجذعان=تسمّع في كلام اللي يجيك بزرق مصفوفة
سلطان الجـذع
اظنك تعرف اللي معه حق ومنهو الغلطان =والا يامغنيٍ بيت القصيده كم هي حروفه
اذا أن اللي يقدر سلعتي وسط البلد عميان =طبيعي لو احصلها ورى الدكان محذوفه
بندر المرشدي
عرفنا الحق وأعطيناه للي يستحق........فلان=ولو سلطان والثاني تولع نار في جوفه
كثير اللي يغوصون البحر ما جابوا المرجان=وانا ادريبه كفو لكنّ يمكن خانت ظروفة
« آخـــر الـــمـــشـــاركــــات »
11-Mar-2008, 12:13 AM
العرض الشجري