%% أنواع الحطب %%

[العود أبو موس]

رحت قبل كم أسبوع أدور حطب , الوالد الله يطول عمره , يشكتي من البرد والدفايات , ولا يدفيه إلا شبة النار . يشب من العصر إلى 11 ليلاًً تقريباً
وكذلك الصبح من بعد الفجر إلى الضحي ؟!

يعني شغلة , وموضوع الحطب صار مهم تشري بدم قلبك حملة حطب وكلها لحيان وقطيع شجر خضر توه صغير حتى لو كان قد يبس ما يصلح حطب عليه الكلام ( يعني عمر الشجرة نفسها ) وتخلي الموقد ( المشب ) حوض رماد_ كرمكتم _



رحت جهة القويعية والرين ووراها أنشد , أبي السمر اللي مات بعد حياة من نفسه , ما قطعه أحد .
يصير عمق الشجرة ( الجذع ) بعرض الجركل الأزرق الكبير 100لتر . عشان تتخيلون
والعرن ( الجذور ) جثلة وقوية وثقيلة وكأنها مواصير مليانه حصا.

صحيح أن المشاوير متعبة , ولكن حصلت الزين واللي قيمته فيه , وبنفس الوقت طلع أرخص .
يعني محمل الجمس ( م 81) ولو فكرت أبيعه يمكن يطلع لي مكسب جيد أشوف أردى منه في السوق بأسعار خالية ولاهو الحطب اللي يرضي الشيبان والناس اللي يعتمدون على شبة النار بإستمرار .

الأكيد أن البيت كله أونس العافية ولله الحمد وبتلكفة معقولة جداً . وقبل كل شي أن الحطب ما فيه خلط ولا تلاعب كله زين من أدنى وهذا يريح مخك .

ترى فيه حملة يطلب راعيها مثلاً 1200 ريال وتشوف جنبة سيارة يطلب راعيها 800 ريال .
وأنت تحاول تعرف الفرق ولاتشوف فرق حقيقي ولكن تأمل :
أبعاد القطع الشلايخ هل هي من دائرة كبيرة أو صغيرة بعض الشجر توة صغير ما عمر ثم شاخ يكون توه
مقطوع .
شوف العرن ( والجذوع يحبونها لأن دخانها قليل ولكن ما تسمر على النار واجد ).
وشوف جودة التقطيع كل ما صغرت القطع أرتفع الثمن أحياناً يقضي لزومك قطع كبيرة ليش تشتري صغار ؟!