ياأهل البر والابل وسعة الصدر؟؟قصيدة تصلحلكم؟؟؟؟

[عبيد المسعودي]

هذه قصيدة من بنيات أفكاري ومعصرات أمطاري
أرجو أن تحوز على رضاكم؟؟؟

يازين مسراح(ن)مع الذود بالجــــــيب = مركب حلاحيل الرجال العريـــــــــــــبه
متبارق(ن)كن الجوانب مشاهـــــيب = شيخ(ن)يخَضْب البِيض من دون شِيبه
كنه ركاب عمان خوش المراكـــــــيب = يدْرج سوات الذيب من دون ريــــــــــبه
طلقة كلاش(ن)لِقْم يوم المغالــــــــــيب = تكسر عظام الخصم دمّه سكـــــــــــيبه
ظنك تشوف الفُلو برْسان تدريــــب = يقمز حزوم(ن)نابيات(ن) نشـــــــــــيبه
كنك تشوف القَرْم بالحوف كالذيـــب = يمّن شرود الذود يلطم حريـــــــــــــــــبه
ذود(ن) كما الغَدْرا بليّا لواهـــــــيب = كنه هضاب البيد حزّت مغـــــــــــــيبه
ليل(ن)يضِفّ العدّ قبل المغايــــــــيب = ترْزِم على المقراح كنْها عطـــــــــــــــــيبه
وبيت الشعر صدّر بليّا اطانـــــــيب = تبْحر بواخير(ن)بقاع(ن) جديــــــــــبه
فضّت بكار المهلكه والمضـــــــاريب = داست عروق النّفد قفْر(ن) مهــــــيبه
تاسم ظهور النفد وسْم المشاعـــيب = تحلف تقول الارض ساح(ن) غزي بــه
يازين ردّتها لصيح المنـــــــــــــــــاديب = تاقف وقوف الجند يوم(ن) نخي بـــــــه
درّت غبوق الضيف ساع المواجيب = نشنش رغاة الدر صافي شريــــــــــــبه
فاح الخزامى من درير المحالــــــــــــيب = شيّن يفوق العلم حيّر طبــــــــــــــــــيبه
ونار(ن)تشادي لاهبات الكواكـيب = ودلالها ببهار صنْعا زهيبه
هيل(ن)وبنّ(ن)والعويدي مراكـــيب = وتعزف فناجيل المقهوي طنــــــــــــيبه
وبعد القهاوي والدلال المزاهـــــــيب = قلّط طلي(ن) ماتخاشر حلـــــــــــــيبه
وعلوم المكارم كالبخور المطايــــــيب = لولا حراق العود مافاح طـــــــــــــــــيبه
ماتقدح الشعله بعود(ن)مراطـــــيب = حتى تضمّ القيظ يقْسَى قضـــــــــــيبه
وعداد ماحامت طيور المراقــــــيب = صلوا على مبعوث دين(ن) هدي بــه

أخوكم/عبيد فهيد المسعودي النفيعي