من ديوان الشاعر / نــــــجــــــم الســــــمــــــريـــــــن

[نجم السمرين]

طفلة المرجوحه

وش على هم الصدور وضيقته وجروحه=ووش على ليل ٍسريته في مغبِّ جْراحه
نبتدي صفحه ونطوي صفحة مشروحه=والجروح اللِّي مـن أَوَّل باقيـه نيَّاحـه
وش خذيت وْوِش بقا ياطفلة المرجوحه=غير همٍ بالضلـوع وغيبتـك ورماحـه
كم وانا لي كم يانبض الغـلا ياروحـه=واعذب حروف الْقصيد بغصنكم صدَّاحه
الدُّموع اللَّي تخالط عبرتك مـع نوحـه=وين أَبا القى له دوا يادنيتي والرَّاحـه
ليتها بي / بس تعتق ناظرك مسموحـه=لو خذت من وسط عيني يالغلا مصباحه
فدوة ٍ لك هي وروحي لو غدت مذبوحه=بس أَشوفك في حياتك بعدهـا مرتاحـه
أذكر إني قلتها يوم الخفوق وسوحـه!!=مودعه بين / اليدين / الناعيه / الذبَّاحه
والا انا ماعاد تفرق جيتـك والروحـه=أقصد أنه قد تساوت جيتـه بْمرواحـه
أشربي فنجان وصله...لاعدمتي بوحـه=واحد ٍ من كثر حبـك بسمتـه نزَّاحـه
وافتحِي له باب قلبك يرتمي بصروحـه=وارسمي حلم السِّنين الموجعه وافراحه
بارك الله في سما البارح وبارق ضوحه=يوم طوَّح في مهب الملهمـه مسباحـه