أوراق شــاعــــر

[هلال العتيبي]

لاحقيني بالنظـــر يانظـرة الطـــرف اللعوبـــه
عيدي النظرة على ماقالــــوا النظرة سلامـــا
مزنةٍ ذعذع بها الغربــــي وجابتهـــــا هبوبـــه
حولها شوقي يحوم ولجلها شوفي تسامــــا
اقبلت مثل الربيــــع انوار وازهــــار وعذوبـــة
عطرها واحساسها وانفاسها ورد وخزامـــى
كنهـــا بستـــان وردٍ ماحدن يعرف دروبـــــــه
غير قطرات المطـــر لاحوّلت فوقـه تهامــــى
اشهداني جزت من درب الغرام وقلت توبـــه
لين شفت اللي جبينه ناهـــبٍ بدر التمامـــــا
ادعجٍ كن العطر يصنع من انفاسـه لثوبـــــــه
يستبيح قلوب خلانه ولا يخشــى الملامـــــا
ان تبسّم ماتشوف الاّ الشفق لحظةغروبـه
وان تكلّـــم ودّي اغرق في ينابيـــع الكلامــا
النسيـــم اليا تعـــداه استدار وعـــاد صوبـــه
يحضنه باحْساس ويضمّه بلهفـــة واهتمامـا
الله يبيحــه على تعذيبـــي ويغفـــر ذنوبـــــه
كثر ماتصدر عن حياضــه معاليقـــي حيامـــا
ان تغلّى تنخلق في خاطري مليــون حوبــه
وان تخلّى راحت ضلوعي من الفرقاحطامـا