الربـيــع الـعـربي ... كديميس صالح

[نامي]

ياإله الكون عفوك والسلامه = اليا دخل فصل الربيع بغير حله
وقام بعض المجتمع ضد الزعامه = والبعض في صفها لكن قله
وصار فالميدان كره وانهزامه = والحبل من بينهم كلٍ يتله
ولا يلام اللي يطالب بالكرامه = من نظامٍ له سنين ٍ يستغله
ودارت الأقدار بأصحاب الفخامه = واصبروا عقب المعزه بالمذله
كل منهم ضاع قدره واحترامه = ولو بغى درب السلامه ماحصل له
واصبحوا بين الغرامه والندامه = وقربوا منهم ملفات الأدله
وكل منهم صار بالنفس اهتمامه = مايلد الخل منهم صوب خله
منهم اللي مالقى فالأرض اقامه = مالقى من يستضيفه في محله
وراح يسبح فالفضاء مثل الحمامه =وكل مايقصد مطار يقول لله
وبعد ماضاق الفضاء خلفه وامامه = زبنوه اهل الحصون المستقله
ومنهم اللي ثاوين ٍ مثل الهلامه = لو بغى ينهض رجوله ماتشله
وقام يشر فالقفص بعد اتهامه = بالفساد المنتشر في مصر كله
وحاكموه اللي من اول بأستلامه = كان سيدهم وصاروا سادةٍ له
ومنهم اللي مايعرف الإستقامه = امتغطرس مير رب البيت اذله
جامع ٍ خبث النوايا بالغشامه = وابتدع له ملةٍ ماهيب مله
والتخبط في النظام وفي كلامه = وينكر المعروف والمنكر يحله
انكر الخامس ويسعى في هدامه = الذي يثبت دخوله بالأهله
ومنهم اللي صار في وجهه علامه = بعد نجحت خطة اللي حابنٍ له
عقبها بان الخلل داخل عظامه = ليا مشى لا حظت في ممشاه خله
علَمه شعب اليمن لبس العمامه = وطلعت صورة خياله فالمجله
ومنهم اللي يقمع الشعب بصرامه = ومذهبه فالبطش معروفٍ سجله
وارثٍ نظام عفلق وانتقامه = وقدرة الله كل مفتولٍ تفله
وكل طاغوتٍ عسى يسقط مقامه = وجعلها تسَمل عيونه بالاخله
ويستريح الشعب منه ومن نظامه = ويتخير للفضيله من يدله

كديميس صالح العتيبي