محمد سعيد القحطاني ربك موجود ؟ ؟ ؟

[محمد سعيد القحطاني]

الطيب طيبك وانت لك يمناً مع جنب(ن) متين=ادحم به العربان لا تخشى من العدوانيه
اسهيل تابع للجدي واهل الجدي متواعدين=مسرى هل الطاله على ذيك الغصون الدانيه

[نــاصـر الـهـاجــري]

لو طال عمر الآدمي لابد تاخذه السنين = والعمر يفنا يا عميلي بالحياه الفانيه
جدّك سميّك يامحمد كان له نعم اليمين = مكان مثله فالسما من فوق هالبدوانيه

آخر تعديل نــاصـر الـهـاجــري يوم 10-Dec-2010 في 02:19 AM.

[محمد سعيد القحطاني]

ليث الوغى لامن حضر في موقفه ماله عوين=ارسم وانا بازهيي الصوره بكل اللوانيه
الموت حق وكلنا نصبر على مافي الجبين=والصبر محمود العواقب من صبر ظفرانيه

[نــاصـر الـهـاجــري]

نجوم واجد فالسما لكن ما مثل الثنين = نجم الجدي من فوق ساطع واليماني ثانيه
كل ٍ يبا يصبر وربي يب يعين الصابرين = والصبر مذكور ٍ بكتب الله والقرآنيه

[محمد سعيد القحطاني]

ماني بحب الموقف اللي يتبعه كثر الونين=والطير يوم انه يطير ايفلل الجنحانيه
ياذيب وش علم العرب تاخذ على الشاري ضمين=ما تاثق بعملته والعمله على الميزانيه

[نــاصـر الـهـاجــري]

علوم تال الوقت صارت بين زين وبين شين = مدري عصا موسى بيده او خاتم سليمانيه
يالله تنصر دولة الاسلام وناس ٍ مومنين = وتدحر رجال الكفر واهل الكفر والطغيانيه

[محمد سعيد القحطاني]

الحمد لله وابن عمك حايزن دنيا و دين=ورث الجدود الاوله ورثتها ورعانيه
الشمس نور(ن) للقمر والا القمر مافيه عين=مال القلوب اللينه ياكود عوج الحانيه

[نــاصـر الـهـاجــري]

كفو كفو يا مسندي لا جات فزعات اليدين = ورثت قولت نعم من عم ٍ وابو وجدانيه
يا شاعر ٍ بالشعر تحسب من ربوع ٍ وافيين = الحرف منـّـك جزل والحانك تهيض اشجانيه

[نــاصـر الـهـاجــري]

محمد سعيد القحطاني

بيض الله وجهك

شاعر جزل و وافي

تشرفت باللعب معك

والختام عندك

والى لقاءات قادمه باذن الله

وسا محنا على القصور

[محمد سعيد القحطاني]

المشاركة الأصلية كتبت بواسطة نــاصـر الـهـاجــري

محمد سعيد القحطاني

بيض الله وجهك

شاعر جزل و وافي

تشرفت باللعب معك

والختام عندك

والى لقاءات قادمه باذن الله

وسا محنا على القصور

الشرف لنا يابن وسام

ووجهك ابيض ,,,, والقصور اذا حصل

فهو منا فعذرنا عليه

وانشوفك على خير بارك الله فيك