أوراق شــاعــــر

[هلال العتيبي]

الورقة 57

البارحة سهران والفكر محتار=ارعى النجوم وليل حالك سواده
ان جيت انام تهبّني نود الاشعار=تعبت واتعبت القلم والوسادة
كثرت هواجيسي وكثرن الافكار=والامر لله حلّته وانعقاده
ياخالقي مابيني وبينك اسوار=وانت الودود اللي غمرني وداده
اخطي واصيب ونفسي تعاند مرار=والقلب نحوك وجهته وانقياده
مااشركت بك حتى لو ذنوبي كثار=بلْساني وقلبي نطقت الشهادة
الطف بعبدك ياعليمٍ بالاسرار=واستر خلل ذاته وعثرة جوادة
وارزقني بحبّك مع الناس الابرار=ووفقني لخير العمل والعبادة
وفي طرقتي يسرلي الصحب الاخيار=اهل العقول الراشدة والركادة
يارب حرّم وجه عبدك على النار=ودلّه على درب الهدى والرشادة
واهده للاستغفار حزّات الاسحار=وفالثلث الآخر ركعتين وزيادة
يآرب تحميني من الخزي والعار=بين الخلايق يوم عرض ووفادة
واكرمني بتوبة قبل تقض الاعمار=قبل العمر يفنى وتفنى جداده
وجنّبني اوقات التعاسة والاعسار=واغمرني بفيض الهناء والسعادة
يارب يامنزل من المزن الامطار=ربٍّ كريم وعمّ خيره عباده
تسقي وطنّا هامي الغيث مدرار=وحقق ويسّر كل حيّ لمراده
وصلى الله وسلّم عدد طلْع الازهار=واعداد ماخط القلم من مداده
على الشفيع المصطفى نور الانوار=خير الخليقه في هداه وجهاده