الرجاء الدخول موضوع مهم في فرسان عتيبه

[قاطع طريق]

أخوي زابن الموضوع صعب
بالمرررررررررررررررة
ولا هو بسهل

وترى الفرسان اللي لهم شهرة
أما يكونون شيوخ
أو شعراء
والفرسان الاخرين لا ذكر لهم
هذا حال الدنيا
يعني مثلا
مشحن بن ماعز يقولون الرواه أنه أطيب من أخوانه شليويح وبخيت
ومع هذا الناس ما تعرفه

وانت يوم ذكرت بعض فرسان ذوي عطية كانوا أما شيوخ أو شعراء
ولكن لو نقول مثلا
بداي بن باين المغيري
أو حراز الخراصي
(اللي يمشي وسط المعركه والبارود شابك ويقول لربعه (قوموا عليهم يا عيال الغنم شوفوا البارود ما ياكلني!!! ))

أو بركات الثقيل

لا جاء نهار الكون نعمٍ ببركات = وباقي المعاني خل قلبك فطيني

أو شديد السليس
أو
أو
أو ...........إلخ
الناس ما تعرفهم
للسبب آنف الذكر
مع العلم ان الفارس شديد السليس شاعر فذ ولكن الله ما قسم له الشهرة
وكان يسمى (مريّح الحشاش) لأنه يريح الحشاشين اللي يحشون الرعي للخيل بقتلها في المعارك
ومن قصائده المشهورة القصيده التي يسندها على عمر بن ربيعان ويقصد الملك عبد العزيز طيب الله ثراة ورحمه رحمه واسعة.
ولكن الناس لا يعرفون أنه هو القائل

يا شيب عيني منه شيباه يا عمرّ = حرٍ مخاليبه تصيد النموره
نوبٍ يجي حلوٍ ونوبٍ يجي مرّ = ونوبٍ يجي بردٍ ونوبٍ حرورة
وعقبان نجد اللي مع الجو تشهرّ = راحوا ورى البيبان في قصر نورة

ثم اغتنم نفسه الرجال وعدل البيت الاخير !!!
وقال:

عقبان نجد اللي مع الجو تشهرّ = جاهن عقابٍ يشبع الحوم سوره

وسأذكر مثال آخر
قبل حوالي ست سنين كنت وارد على مطق الثندوة (المشروع) ولقيت لي شايب من الحفاة يروي وايته وهو ينتظر الوايت يمتلي كان يغني ويقول:

سلام يا عدٍ وردك امحبوبي = اللي شرب وضاح الانياب من ماك
يا نعنبوا قومٍ عليك أوردوا بي = ما جنبوا بي عنك يا عد مناك

ويوم نشدته عن صاحبها قال الشايب:
(والله يا وليدي مدري يا عودن اللي قايلها جني !!)
طبعا القصيده هذه يعرفونها رواة ذوي عطية وهي لأحد فرسانهم واسمه محيا بن دويسان العطاوي
والناس اللي برى يعرفونها ولا كن لا يعرفون القايل !