نشدت اللي نشر عن خير خلق الله بالتعليق

[حسن إبراهيم الدجيماء]

قصيدة متواضعه
,,
تتكلم عن نفسها
,,
ولاتحتاج مقدّمات

نشدت اللي نشر عن خير خلق الله بالتعليق = علامك كيف تقذف في رسول الله وتفزعنا
علامك ماتعرف انا سلايل عُمْر والصديق = علامك ماتشوف أمجاد الامه في مراجعنا
علامك ماتعرف انا من أوّل مثل ضلع طويق = جميع جيوش كسرى والقياصر ماتزعزعنا
علامك ماتخاف انا من اقصانا عليك نضيق = اكيد انك نسيت ان الشهاده من مطامعنا
وجاوبني ,, كفايه تصنع لتاريخكم تسويق = لو انا مانعرف الفرق كان انّا تراجعنا
كفى يابن الدجيماء مانبا محضر ولا تحقيق = كفاية ,, تدري انك توجع انفسكم وتوجعنا ؟؟؟؟
صحيح انتم هل الماضي ,, حقيقه ماتبي توثيق = لكن الحاضر المشهود زيّنته بدايعنا
انا بنشدك ,, حتى لاتقول اعلومكم تلفيق = فلسطين انشدك كم جالها داخل مراتعنا
من اول سبعه وستين دينٍ يفقد التطبيق = ليا هالحين وانتم ماسعيتم في مصارَعْنا
وبغداد اختها فالليل تِصْرَع والصباح تفيق = تفيق تصيح للأمه وتِرجِعها مدافعنا
لقينا مالنا في حاجه لموعد ولاتنسيق = واخذناهن ولحدٍ فيكم اللي قام نازعنا
على ماضيكم ابكوا مار ماحاصل لكم توفيق = مادام انا ليا منا خطانا محد رادعنا
وبقّوا من دموع الذل ,, بقّوا مايبلّ الريق = ترا قدامكم ماكان تذرف له مدامعنا
عرفت الحين يانشّاد ليش القذف والتعليق = علشان التذلل والخضوع اللي بلا معنا
سكتّ ورحت من عنده ,, وانا كلّي هموم وضيق = اشوق لماضي الامه ,, واعزّي فيه واقعنا

,,

حرّرت في : الأربعاء / 26 / 6 / 1431هـ
,,
إحترااامي