سهير القيسي

[عايض القوبع]

أرسل لي صديق (رفض أن أذكر اسمه) على الجوال هالأبيات :

ياعايض القوبعي ضاعت هواجيسي = والعين من لوعتي حارت بها عبرة
وتقاطر الدمع واحرق لي قراطيسي =والجوف مليان جمرة فوقها جمرة
سبة بلايه وموتي طلة القيسي =هاذي سهير وهذا هو موجز النشرة
قمت العب من الطرب واضرب مراويسي=واقول طابت لنا ياصحابنا السهرة
ياعايض الفاتنة لعبت باحاسيسي= في حالتي يالنفاعي شف لنا دبرة

ورديت عليه أقول :

ياسعود ياصاحبي لا تزهم ابليسي = محشور له كم سنة والحشرة الحشرة
مقفي عن الحب وأعلامي مناكيسي=والقلب ماينقصه همٍ ولا حسرة
ورجعت لاجلك أبرق فالنواعيسي =ياراعي الذوق يابو الصنف والنظرة
وضيعت بين العربية و(الام بي سي)=مجمع غنادير والهبرة على الهبرة
احجز على دبي ولا احجز على( الفي سي) = واللي يبي حاجته ماتمنعه سفرة