عبدالله رجاء العنزي وحكم واقعيه

[قو الصخر]

ياحسين تكفى قلنا ويش الاخبار=تكفى ترا حالي تزايد نكدها
مليت انا ياحسين والحال منهار=والنار في جوفي تشاعم وقدها
صبرت انا ياحسين والصبر ماصار=صبري تملل من توالي وعدها
اسري مع الهاجوس والفكر مشوار=واحلامنا ترسم معالم نكدها
حنا على دور(ن) به اضوا واقمار=دور(ن) غريب وشاب منها ولدها
دور(ن) جعل من يشري الطير صقار=واللي شراه اليوم يجهل هددها
والطيب مايذكر على الجود والكار=الطيب بالاموال وكثرة عددها
ياحسين مال الجود غايه ومقدار=ونفسي على ماقول ثابت صمدها
حتى السحاب اللي به مزون وامطار=يشكي الحسد ياحسين من ماحسدها
وحتى القصيد انباع واصبح له اسعار=والصحف والاعلام صارت سندها
واذكر زمان الصيت من دار لا دار=يوم الغنايم لشجاعه وحدها
والنوق يكسبها طويلين الاشبار=يوم انها بالسيف تجلب بيدها
واليوم اهلها يافتى الجود تجار=لوكان هندي مايهمك حشدها
همي على قلبي مثل صالي النار=وشوفي على ماشفت يفجع رغدها
ياحسين تكفى قلنا ويش الاخبار=تكفى ترا حالي تزايد نكدها