مرزوق الجذع و شالح المقاطي.....غـزلـيـــــــــة

[جناب الود]

السلام عليكم ورحمة الله وبركاته

هذه قصيدة غزلية جديدة رائعة
لشالح بن نايف المقاطي
مسندهـا على زميله مرزوق بن دغيليب البام الجذع
ورد مرزوق عليه أيضاً بقصيدة لاتقل عن قصيدة
شالح روعةً وجمالاً


وأرجو أن تحوز على رضا الجميع

يقولــ شـالــح:

يالبام قلبي فيه عله من العام=حرارةٍ تسري عليه وتعمه
يالبام ماهي وسوسة جن و أوهام=في ذمة اللي يشكي القلب ذمه
يالبام شخَص علته يا ابن الأكرام=سمَ العلاج لساهر الليل سمَه
وإن قلتلي متى بدت معك الآلام=اعطيك تفصيلٍ بسمعك تصمه
لمحتلي زولٍ عليه القدم حام=صدفه وأنا متعديٍ في مهمه
العام ها الأيام والناس صيام=ضوَا عليَ الذنب لا رحمت امه
اللي تلقى ثومة القلب بسهام=غروٍ تحدى لابسات الأزمه
من خوخة البصرة ومن مشمش الشام=ياخذ شبه في حلو شكله ودمه
وإن ركز النظره بغنجه وسلهام=عين أشقرٍ يحري العشاء في متمه
واهنَي سلسال الذهب فيه يالبام=اللي تحضن زين عنقه وضمه
يدوس عصمان الشوارب بالأقدام=ويدخل مقاريد الهوى وسط كمه
عنده ثقه تزمي على روس الأهرام=إنه يبا يجلب علينا المطمه
ومن عقب ها اللحظة وأنا بارد عظام=ماهيب في وقفة ولد لإبن عمه
في مواجه الخفرات حلوات الأجسام=اللي عناهن يورد الرجل جمه
وهذا وجفت فوق الأوراق الأقلام=من عقب شكوىً ترتجي منك همَه
يوم أنت من صلبين الأريا ومقدام=ولك باع في حب الصبايا ولمه
كم مرةٍ من حبهم فاتك الزام=تسهر وتنسى الزام منته بيمه
يدق خفاقك على دق الأرقام=تفك جوالك وترجع تخمه

*ملاحظة:
المقصود بالزام: العمل(الدوام)




وهذا رد مرزوق البام:

ماجور ياللي غاديٍ فكرك أقسام=والحال باريها الهوى مستسمه
تشكي وفيك الحب بانتله أوسام=وسمٍ ردوعه شاهد لكل نمه
أنا أشهد إنك واردٍ حوض الإعدام=من يوم قلبك شاطي البيض طمه
والمشكلة قلبك رهيف وعزام=وهم الموده يالهراني يزمه
مالع علاج إن كان كثرن الأورام=ألا إن حصل من مبسم الغرو شمه
يمكن تعالج بعض الأورام ما دام=باقي بدمك عينتٍ مستلمه
ظني وأنا مانيب للغيب علام=والغيب عند اللي ترجاه الأمه
والراي كاننك مصمل وجزام=اركب على اللي مابه أحدٍ يذمه
جيبٍ جديد وللمشاوير ميلام=لا نشت ابنصه ماش درب يهمه
لكن بيَن لي على الدرب مرسام=لو دونه اعجاف الزمن مدلهمه
لجلك ابا اطا بالقدم جلمد السام=ولجلك غثا الأيام ابا ابوج كمه
أبشر بفزعة من حديته على لام=قافٍ برح طرقٍ وطرقٍ يدمه
فزعة طنا فيها ملامح لصدام=ماهيب فزعة قاصر الباع رمه
قلته وأنا ماني على القيل لوام=يوم المقاطي قام يومي معمه
من سبته طير الغرابيل لو حام=والله ما أجنب لين ينجال غمه
ما باقي ألا أخالف شروط الاسلام=وأضرب بسيف الظلم مع كل يمه
وختامها ياعنك ماقصر البام=يوم إن شالح درع البام همه

تحياتــ جناب الود ــي