الا ياراكب اللي مشيها فوق السحاب

[ابو وافي]

بسم رب الكون نبدا قبل رد الجواب = وصلاتي على محمد بعد ما نبتدي
الا ياراكب اللي مشيها فوق السحاب = كنها نجمه ما بين الثريا و الجدي
جنحانها يافهد مثل جنحان العقاب = فيها اربع امحركات(ن) نفاثه ترعدي
بعد حجزت التذاكر في ذهاب واياب = الذهاب امأكد(ن) والاياب امأكدي
لا تاخذ معك حقيبه ولا تاخذ زاهاب = رحلتك ساعات يم الغضي ومعودي
احمل سلامي لخلي وسلمه الكتاب = ون نشد عن حالتي قل خويك ينشدي
الرساله اللي مضمونها لوم وعتاب = علمه كيف انا بعده وهو كيف ابعدي
العيش من بعد فرقاه الي ما يوم طاب = توحدت بي همومي وانا متوحدي
اتقلب في فراشي كني قريص داب = عيني جفاها النوم وجنبي جافا مرقدي
اه يا قلبي اللي مولع(ن) فيه التهاب = التهاب(ن) محرق القلب عيا يبردي
لو ادفنه في جبل من جليد ان كان ذاب = والسبايب صاحب(ن) فالهوى متعندي
واليوم قررت اسوي على القلب انقلاب = بعد ما عجزت معها وسويت اجهدي
غاب حبك عن حياتي وكل الشوق غاب = وقت الشقا راح واليوم ابعلن مولدي
الهوى ياهل الهوى يفقد الرجل الصواب = من تبع عشق الرعابيب لا بد ايغدي
الا يالله يلي خلقت أدم من تراب = ماحمل به رحم انثى ولا رضع ثدي
يا مقيم الوزن يالقسط في يوم الحساب = لا اله الا انت امنت بك واشهدي
يا مرسل محمد ومنزل معه الكتاب = امنت ابنبيك امحمد وخير الهدي
اغفر لعبد نوى يهجر اذنوبه وتاب = تارك الدنيا ورى ظهره وجاك ايعدي
طامع في عفوك وراجي حسن الثواب = ومعترف لك بالمعاصي وما سوت يدي
واعوذ بالله لا كون من شر الدواب = الصم البكم اللي اقلوبها فيها الصدي
وداخل(ن) عليك يالله من سوء العذاب = يا الهي يارحيم ابرحمتك استنجدي