::":: نوينا نغسل الشعر بالسدر والكافور ::::"::::ونفصل على جسمه قماشٍ يوافقله

[آلاد غنـــام]

نوينا نغسل الشعـر بالسـدر والكافـور=ونفصل على جسمـه قمـاشٍ يوافقلـه
ليا ماحصل للشعر بيـن القبـور قبـور=قبرناه في البشت الحساوي مـع الدقلـه
نباه يتريح خاطـره لـو مغـار شهـور=ويرتـاح فتـره مـن كـلامٍ يلفقـلـه
حنوه العبـاد الضايعـه حنيـة الباكـور=لونه يجي في الـوزن والقافيـه شقلـه
تقول إن واحدهم يسولف بـدون شعـور=ينفـض يدينـه والمذيـعـه تشدقـلـه
هدفه الوحيد ورغبته يكسـب الجمهـور=وياللأسـف يلقـى شبـابٍ يصفقـلـه
قبل يبتدي يرفع مقامـه ثـلاث سطـور=ويظهر على الشاشه مغير أطبخه واقلـه
يقـوم يتنرفـز لامجاهـد ولامـمـرور=يبا يكسر التلفاز والجـدر مـن صقلـه
وانا ملحق الي فاهم ٍ في السلوب قصور=مهندس خبير وينتج الخـام مـن حقلـه
من الذوق والابداع عالـج كثيـر امـور=ليـا حـس موضـوع ٍ مهـم يتطرقلـه
يعد القصيد بعقـل ماحـط فيـه كسـور=وهل الذوق من حلـو المعانـي تذوقلـه
وقيل أسال الرجال في المجلس المحظور=وتلقـى تماثيلـه دليـلٍ علـى عقـلـه
واشوف الرديف اخلف مكانه وركب الكور=وفهق عنه راع الكور والعـام يفهقلـه
زمان الدعايه حط له ناس فـي حـادور=يضيـم الحيـاوي والفشـور يتعتقـلـه
وهاذا حل من سموه في وقتنا الهامـور=ليا اقبل على بعض المجالـس تسابقلـه
يغرك بهندامـه وماحـط مـن ديكـور=سراب ٍ ضحاحه كـل عطشـان يبرقلـه
وانا استثنى الي زادهم بينهـم مخشـور=ليا شاف له محتاج في النـاس يشفقلـه
يساعد هل الحاجه وييسر على المعسور=حريص ً للفعل الخيـر والخيـر وفقلـه
وانا يعلم الله مارغب الجاهـل المغـرور=يجـي ويتعـدى خاطـري ماتشوقـلـه
ولااحب الهبود اللي يجيب العلوم العـور=ياليتـه يوكـل واحـد ٍ عنـه ينطقـلـه
يسولف بلا معنى ويزعل بـلا سبسـور=تمل اجتماعه ملـت الارض مـن نقلـه
اراعي نظر غيره وانا خابـر انـه ثـور=لوني ليـا شفتـه علـى الكبـد ياثقلـه
يعسر العرب بالشور ماهوب راعي شور=مصر ٍ على الراي العوج دوب تسرقلـه
اقوله وانا جربت مـن وقتـي الميسـور=يمـوت البنـادم والمـنـى ماتحققـلـه
يبا يبطي الجاهل وسـود الليـال تـدور=ولاادري ولايدري من الشمس تشرقلـه

الشاعر / مقحم بن دحيم الغنامي