قصيدة رثاء في شاعر العرض ابراهيم بن سعد العريفي الخالدي - رحمه الله

[عبد الله العريفي]

بسم الله الرحمن الرحيم


السلام عليكم ورحمة الله وبركاته

هذه قصيدة - رثاء - معبرة جدا قالها الشاعر الاستاذ عبدالله بن سعود بن سليمان المطوع
( الملقب بأبي سفيان)
وهو من شعراء قبيلة بني زيد في محافظة القويعيه

قصيدة معبرة ومؤثرة جدا لانها من قلب محب للفقيد الغالي ابراهيم بن سعد العريفي الخالدي رحمة الله عليه, ولعل ما يخرج من القلب يدخل الى القلوب

فشكرا جزيلا لابي سفيان الشاعر المعروف الذي يحترمه الجميع لما يتمتع به من اخلاق دمثة ووفاء واحتراما للجميع
حتى صار الجميع يقدره ويحترمه ويتشرف بمعرفته .. فشكرا لك يا أبي سفيان

واليكم رثاء الاخ ابو سفيان

=========



قصيدة رثاء في الفقيد الغالي والأب الحاني شاعر العرض الشيخ إبراهيم بن سعد العريفي الخالدي - رحمه الله رحمة واسعة واسكنه فسيح جناته وجميع المسلمين آمين .

الا يالله لطفك يـا عزيـز يمضـي مـراده=على حكمك وتدبيرك يسير أمر القـدر كلـه
الهي ياملاذ العبـد كاشـف ضيقـة فـواده=ليا رام الحزن قلبه وجـاوب دمعـه وهلـه
قسى الفرقى صعيب وحرها ما تبرد اكمـاده=ليا عادت طواريهـا تهـز القلـب وتتلـه
الا ياتل قلبي راح قطـب البيـت وعمـاده=عريب الأصل سداد النوايـب دامـح الزلـه
إبراهيم السعد يالله عسى في دربه اسعـاده=عسى له رحمة تكسيه من دار الرضى حلـه
إبراهيم الفخر في ذاته وفي معـدن أجـداده=أقولـه للعريفـي ماعلـي مـن لامنـي لله
شجاع يكسب الجزله وهي في سيرته عـاده=ليا ورد حصيف ويفتـل الجزلـه ويندلـه
معالي سيرته من فعله ومن قدحـة ازنـاده=كسب نوماسه وكبد الحسود اتغص بالعلـه
على روس النوايف والمعالي شيد أمجـاده=فعوله ترفع الراس ويشيـد المجـد ويحلـه
سريع اقرى ظليل اذرى مهاتيـش وهجـاده=حداد وللكبـود اليابسـه فـي فيتـه بلـه
الى جا الظيف يلقى في ربوع الجود واجواده=سمان الحيل وسمان الشعر والطيب والدلـه
لبس تاج الحيا والسمت حلم ودين وعبـاده=وهو في حكمته من جالسه ما يلحقـه ملـه
يوقف للعيا ما هوب لاشـاف الخطـا زاده=على جاره وربعه والعوانـي يجبـر الخلـه
سلايـل لابـة لاوردوا المـاء قــل وراده=أهل فنجال مع معدال وأهل الرمـح والسلـه
خوالي كاسبين الطيـب ومريفيـن نشـاده=لهم في ساحة الطولات ماضيٍ شاهدٍ حلـه
أقوله واشهد الله في غلا إبراهيم وأشهـاده=الا يالله فـي ظلـك نهـار الغاشيـة ظلـه
عليه العين تدمع والحزن في القلب وقـاده=ولكنا على درب الرضـى لله علـى الملـه
انداوي كسرنا بالصبـر والاقـدار منقـاده=نساله يغفر المام المعاصـي ويغفـر جلـه
عسا نو السحاب اللي تلاحق فيـه رعـاده=يعاود رمس راع المرجلـه يسقيـه ويعلـه
قوله وارجي الله يجعل الفـردوس ميعـاده=ويجمعنا بدار يضحك ابها الخل مـع خلـه

الشاعر : عبدالله بن سعود بن سليمان المطوع
(أبوسفيان)

( من قبيلة بني زيد)

( محافظة القويعيه)

++++++++++++
صح لسانك يا أبي سفيان وبيض الله وجهك على هذه القصيدة المعبره ونسأل الله ان لا يحرمك الاجر في هذا الرثاء

تقبل تحياتي الطيبة ودعواتي القلبيه
اخوك:
عبد الله بن براهيم العريفي الخالدي

آخر تعديل عبد الله العريفي يوم 01-Jul-2009 في 01:30 AM.