وصية فيصل الرياحي,,,

[ابن صنهوت]

بسم الله الرحمن الرحيم

اخواني اعضاء المنتدى الزوار الكرام رحل بالامس القريب شاعر دمعة لفقده العيون وحزنت له القلوب شاعر غني عن التعريف
شاعر اتصف بالاخلاق والرجوله والمروه والشهامه والكرم ووووو.....
رحل فيصل بن منصور الرياحي ولكن لايزال معنا ولو غاب عن العيون مازالت تحتضنه القلوب .
رحل وترك لنا ارثا من الحكم والنصح والادب
فاليوم اضع بين ايديكم دره من درر هذا الرجل العملاق اتمنى ان تحوز على اعجابكم وان تستفيدون مم تحويه من الحكم والنصح

يابدر خذ وصيه واعتبرها وديعه=
الله اعلم متى يابوك يوم الوداعي=
يجري العمر والايام تجري سريعه=
سرها قبل رمي اسهومها مايذاعي=
يابدر نحمد الله ماعلينا هزيعه=
رغم بعض العواصف رافعين الشراعي=
نطلب الله يوفقنا دروب الشريعه=
ما ندور على دروب الغوى والضياعي=
ونطلب الله يجنبنا الامور الشنيعه=
لاتعاوى علينا ضاريات السباعي=
يابدر ماجنيتك من بيوت الدنيعه=
النفوس الضعيفه والقلوب الوجاعي=
يابدر مركزك بين الحصون المنيعه=
اخذ منا ومن جدك حميد المساعي=
يابدر من يحاول هزعتك لاتطيعه=
الجبال الشوامخ ترفض الانهزاعي=
ومن قطع رفقتك قله يامال القطيعه=
يارفيق المذله مال رفقتك داعي=
وكان بعض الرفاقه جاك منهم وجيعه=
قد يكون الفراق افضل من الاجتماعي=
لاترافق خبيثين النبا والطبيعه=
سقط ناس سوالفهم تجيب الصداعي=
يلبسون اقنعه فوق الوجيه الوضيعه=
وعن وجيه الردا لا زام يطيح القناعي=
واجد الطيبين ولا تضيق الوسيعه=
دور اهل الوفا واهل الصدور الوساعي=
والصديق الصدوق المحترم لا تبيعه=
احتفض به وخلك للمواثيق راعي=
واحذر الضحكه الصفرا من اهل الخديعه=
حلل افكارهم في مختبر فكر واعي=
بعضهم يتخذ من كل حاجه ذريعه=
يكرهون البنا ويفضلون التداعي=
ولاتضلي خلاف الناس مثل التبيعه=
كلمة النعم جاهد وانتزعها انتزاعي=
لاتاخر جوادك خلها فالطليعه=
خذ مكانك مع اهل المجد والاطلاعي=
المذمه على الانذال ماهي بديعه=
والمدايح يحصلها طويل الذراعي=
والتزم في حبال الله بم تستطيعه=
من تمسك بدينه جا بو جهه شعاعي=
والصبر له عواقب طيبه لاتضيعه=
قدر الصبر والله معك وامره مطاعي=
كم صبرنا على بعض الامور الفضيعه=
نعتبرها من التافه وسقط المتاعي=
وكم لي اصارع الدنيا بنفس(ن) شجيعه=
واجتهادي يحقق لي نتيجة اصراعي=
اتفاول بخير ودم وجهي ما ابيعه=
كل شي يباع الا الحيا مايباعي=
اعشق العز واحب الحياه الرفيعه=
واكره الارتخايه وارغب الارتفاعي=
واتواضع لسمحين الوجيه النصيعه=
واترفع عن اهل الزيف واهل الخداعي=
يابدر لاتلفت للعقول الخليعه=
قدر الراس قدره لاتحسب الكراعي=
كم سمحنا وسامحنا خطات الخميعه=
حشمة الطيبين وقصرة للنزاعي=
ما عرضنا لحمنا للوحوش المجيعه=
لو شربنا من الحنضل وسم الافاعي=
ولن وردنا خصومة حق والا نزبعه=
عضمنا ما يلين نكيل صاعن بصاعي=

رحمك الله يا ابا بدر اااامين

وسلامتكم محبكم بن صنهوت