عيني تجي من دونها ومن وراها

[كريمان]

السلام عليكم ورحمة الله وبركاته
اقدم لكم هذه القصيده لشاعر /عبدالله خميس النواق الشراري
وعسى ان تحوز على رضاكم




انا وقفت بـدار زيـن التواصيـف
بيتلعـة(ن) نـاد الهـوا بغضاهـا
قفر(ن) منازلهم اغصونه مهاديـف
فرعه ثقل علـى عصـاه وحناهـا
يلعب بها طيرالمحاير على الكيـف
كنّه يـدوّر حاجـة(ن) مـا لقاهـا
وانا وقفت احلّـف الـدار تحليـف
وعيني تجي من دونها ومن وراهـا
ابعدت شوفي مع اوساع الاطاريـف
وفهمتها من واحد(ن) مـا حكاهـا
فهمت مـن شعبانهـا والمشاريـف
واسكوت جانبهـا ولجّـت قطاهـا
اقفى مقفان(ن) عليـه التحاسيـف
يتلون عدلات(ن) اطوال(ن) اخطاها
متسابقات الروض تاطا الحراجيـف
امقومـات النايمـه مـن ذراهــا
يا ما ركض مع دربهن من مواليف
وياما بكت عين(ن) صعيب(ن) بكاها
وانا بعد دمعـي عليهـم خذاريـف
وانا حسب اعزومي بيعيد(ن)مداهـا
منزالهم تلعـب عليـه العواصيـف
يمـل قطـاع الفـرج مـن خلاهـا
وجرّيت ونات(ن) تسوج السراجيف
سوج المحوص المثقلـه مرتكاهـا
على قليـب(ن) وارداتـه مزاهيـف
حمض(ن) مفاليها طويل(ن) ضماها
جرد الرقاب مرفّعـات الغضاريـف
نسْيَت غلا حيرانهـا مـن ضماهـا
على وليف(ن) نتّف القلـب تنتيـف
تنتيف ذربـات المخالـب عشاهـا
وعليه كن بوسط قلبـي شغاريـف
ادنات ما ألطمهـا وحـرّث بلاهـا
لما غدت حالي مثل عشبة الصيـف
حرّت عليها الشمس وابعـد ثراهـا
ومن كل جانب يلفحنّـه عواصيـف
على شفا حزم(ن) قليـل(ن) ذراهـا
لما غدا تالـي ورقهـا سفاسيـف
وتجـرّدت مـا باقـي الا عصاهـا