الشاعر/عبدالله بن صقيه التميمي

[سلطان نايف العضياني]

يسرني أن أطرح لكم هذه القصيده وجدتها في أحد الصحف اليوميه
ولربما أنها تحكي عن مايحدث في العالم الإسلامي من نزاعات وانحلال أخلاقي في بعض الدول العربيه,,,,

ياتل قلبي تلتينن تتالا=تلت دلو مورد ضمايآ نتلها
احيام وضحن قيضت بالشمالا=ملّا الحياض إلها عجل وانده إلها
أم الحوير عشرت ياهلالا=عساك تعرف يوم تضرب فحلها
أنعيم وامنة(ن)تبوج السهالا=والذيب عقب الهيبه أستنعج إلها
عند الهمج صار المحرم حلالا=الخلق كثرت يامكافي حيلها
الصدق دون أسباب ظلم يغالا=بعض الذمم دلت تباع بهللها
الناس تعرف كل من حط شالا=ياموقظ الحيه بمحثلك شلها
ياحيف يادار القروم الرجالا=جاها عرم سيلن ودمر حللها
أعتزت البيزه ورخص الريالا=والثيب أم عيال عافت بعلها
أدول على دوله بضلمن تمالا=ياكثر من لايوّمن من دولها
ماعاد تاثق ياليمين الشمالا=عوى على راس الطويله ثعلها
الموت كان الحمل ياشعيل مالا=الله عن الميل الكريم يعدلها
الوادي المسني من السيل سالا=والسدره أم الشوك نونا نحلها
زلت عصور مكرمين السبالا=وحلت محنية الاظافر بدلها
بعض العرب لو يلبسون الشيالا=وتجلس مع النسوان كان احسنلها
دارن بها يرقص بدبره جهالا=لاتامن إن الله يخسف أب أهلها
لابد من بعد النزول إرتحالا=إليا سئلتا كلمة الحق قلها
اصدع بما تعرف على كل حالا=لاتلتفت لرضا العلوج وزعلها
قامت على الناس البلاوي توالا=من عالمن تورطت في جهلها
نرجي من المعبود جل وتعالا=مبري علل من لاتعالج عللها
إنه يكافينا ميول الليالا=وعواقبن تنخاف مانحتملها
ثقال الحمول إلها تدنا الجمالا=يانمرها ياليثها ياجملها
أوط العدا بالحق وطي النعالا=اللي يشيل أحمولها يبرك إلها
هاك الطيور اللي منول تشالا=حول لها من قرنسلها واكلها
اليوم بعض الناس جاهم هبالا=مدري وش اللي لابلينا هبلها
بين الاسد والنمر طال الجدالا=الله يعين أن كان طول جدلها
وشلون غبتي يانجومن تلالا=والجدي هاك الحين خان بزحلها
ترا الجداد اليوم غير السمالا=النار تحرق يانمر من شعلها
إليا نزلت إنزل بروس الطوالا=وزلات جارك لو يزل أحتملها
بلاد غيرك لو زهت بالجمالا=خلك بدارن كل مسلم دهلها
إديار أهلها يتبعون الدلالا=يستاهل الأمداح حي نزلها
والخاتمه يامدعين الكمالا=الكامل اللي كل خلقه كفلها

الشاعر/عبدالله بن صقيه التميمي

في أخر القصيده أبيات غامضه ولكن من يفهم الشعر سوف يفهمها,,