سقنا عليكم ياسليم الوجيه البيض عامين ...

[وحي العقل]

الاخوة والزملاء في منتديات الهيـــــــــــــــلا
يسرني ان اقدم لكم محاورة رائعه بين الشاعر / حمدان العصيمي والشاعر / عبدالله ابن عتقان

أعجبتني في معناها وقوّة بيوت شعراءها وإسلوبهم الذي يذكرنا بالشعر القديم فعلاً

أترككم مع الحاوره

حمدان العصيمي

الليله الموضوع حاضر بحاضر مانبي دين=يالله لاتشقر عصانا ولاتغضب علينا
سقنا عليكم ياسليم الوجيه البيض عامين=واثر الغلط ماهو غلطكم غلطنا يوم جينا

ابن عتقان

يا صاحبي حمدان حث القدم وحده وثنتين=الدرب واضح معتدل لايسار ولايمينا
السن فيه السن يا اصحابنا والعين بالعين=أنتم بذلتوا جهد والامر كله في يدينا

حمدان العصيمي

السيف أبو حدين ماينكسر في كسر سكين= علّم قضاة الحق بالعلم والخافي يبينا
الوقت يمضي والنشاما لهم سلم وقوانين= ياليتنا عن سلمكم ياهل الحره درينا

ابن عتقان

قمتوا على الموضوع من حرصكم مثل المجانين= من طيب سيفك ماقطع غير روس الغافلينا
وشعيل يا حمدان يسوى من جمالك ثمانين = لاتحسبنا في جملنا خلصنا وانتهينا

حمدان العصيمي

أنتم ذراكم فالشجاري وفي خضر البساتين= والاّ ذرانا العزم والصبر والجنب المتينا
تبا تقرّبك الليالي لنا لوكان بعدين= ماينكر الوقفات غير الجبان ابن اللذينا

ابن عتقان

وقفاتنا تكفي وتاريخنا ماضي وذلحين= ياللي تذرا بالبشر وين رب العالمينا ؟
أنتم عيال آدم وحوى ولافيكم سلاطين =ما أخذتوا الا ربع لقمه من الكبش السمينا

حمدان العصيمي

تاريخكم عنه القبائل مية عام متغاضين= ان كان فيكم شك لاتدخلون الشك فينا
حنا عيال آدم وحوى وأبونا آدم من الطين= على سلوم الناس بالعز بعنا واشترينا

ابن عتقان

روح أنشد اللي حضروا جيوشنا في يوم حطين= يوم ان نص اصحابنا فالملاجي نايمينا
اهروجكم لاباس واحوالكم مابين ( قوسين )=- من كل فج وصوب متجمعه ومشكلينا

حمدان العصيمي

لو تعدل الباكور ماتعدل رقاب البعارين= اللي مباركها ورى الضلع وتجر الحنينا
تكرم يمانينا ولاهمنا زاد المساكين =اليا رضيتوا بالمذله ترانا مارضينا

ابن عتقان

يوم أن بعض الناس مايعزل المويه عن الطين= حنا وردنا فوق هداج غصبا وارتوينا
عاداتكم طمس الحقايق وتزوير البراهين= متوارثه من يوم عصر الجدود الاولينا