ناصر المرشدي
مرحبا باللي غيابه ماتقول الا حضوره=ان حضر كلِ درابه وان مشى كل درابه
لو يغيب الصوت له عندي من التقدير صوره=وصورته لو غاب عني ماتكفي في غيابه
علي فلاح العضياني
البقا ياللي بمنطوقه يعبّر عن شعوره=و الكلام اللي يقوله صاحبي حاسب حسابه
و الله إني ما اتغيّب غير في وقت الضروره=وان حضرت ادرّس الشعّار في موقع عتابه
ناصر المرشدي
ابشر انّا عايشين بخير والدار معموره=كل مازادت ضروف الوقت زدنا في صلابه
فالضروره يعرف الرجال من فعله ودوره =كان مانت بذيب يالفالح تعشتك الذيابه
علي فلاح العضياني
الله يعزّ السعوديه بظل اخوان نوره=ارقد آمن في ظلال اللي لهم عزّ و مهابه
يكمل الماجوب و المطلوب من طالت شبوره=ساع يا ناصر علاك الذيب قام يحدّ نابه
ناصر المرشدي
بعد ماسجيت رجلك من تبوك ليا شروره=احمد الله يوم جسمك تستره عنا ثيابه
الهقاوي والعزاوي ياولد روق مخبوره=كل سيف ِ سلته في لازمه تحمى نصابه
علي فلاح العضياني
ناصر اللي ما يقصّر ما قدر يبني قصوره=وش يسوّي كل ما انهلّت على راسه سحابه
من طلع ياخذ على سطح القمر لفّه و دوره=مارجع ياخذ فالارض البور لفّه وانقلابه؟
ناصر المرشدي
لاتخليني عليك اضيق من عمياء مشوره=انت تعرفني ليا جات الصمايل والمجابه
شب ناره واحتمت لكن مافاحت قدوره=مايودي شي عنا وان لقاله شي جابه
علي فلاح العضياني
انت لو أقرا عليك الفاتحه و آيات سوره=ما ارتفع صوتك و قدّامي ماعاد تقول جابه
انت لوّ تروح تفرسك الذيابه و النموره=ولاّ انا من يعترضني واعناه اوّاعذابه
ناصر المرشدي
فالسعه كلِ يقول اللي يبي ويدق زوره=والصمايل تضهر الرجال مَن حضرة جنابه؟؟
ودي اضهر صاحبي بالعرف عن فكره وطوره=انحنى من حر مايونس مثل قوس الربابه
علي فلاح العضياني
الجدي نجم يدلّ اللي يزلّ الدرب نوره=يوم ابو ذيل ان بدا و ان غاب ما زول اقتدابه
هيه يا ناصر لسانك لا يجرّك للخطوره=الله اكبر باح سدّ المرشدي من حرّ مابه
« آخـــر الـــمـــشـــاركــــات »
05-Nov-2008, 10:55 PM
العرض الشجري