مرثية الشيخ عبدالعزيز بن جامع

[عقاب بن سقيان العتيبي]

قال الذي ما مال حضه ولا مال =ولا له على الميلات نفس تطيعه
ولا زلل الزله ولاهوب زلال=وقول بلا برهان للرجل ضيعه
ولاحب تلحقني مشاريه واقوال=النذل مايلقف بسمعه يذيعه
يالله يامحص الخلايق والاجال=يامكلف الانسان مايستطيعه
احفظ لنا اللي نستمع له ليا قال=له عهدنا اللي مانخونه وبيعه
وعونك على دنيا تقلب لها حال=يوم ضحوك يوم عبسا فضيعه
دنيا ركايبها هجيج وزرفال=تسطي وترمي بالسهوم السريعه
مذمومة من يوم خلقت على جال=فيها الشباع من الطمايع مجيعه
غريرة تغري وتحرم وتنهال=وفي حساب راعين العزايم رضيعه
كم شيد ملك في الخوالي وكم زال=وكم سادوا اقوام لفوها نزيعه
دنيا مركبة على وعد وامال=في كل بيت لها مصاب تشيعه
تقفي ولو زانت ليالي بالامحال=فيها السنين تخيلهنه سويعه
ريف قواصيده رعايا وحوال=واصبح عقب ممسى كثير صريعه
وشدوا منه ماكنهم فيه نزال=وامسى خلا خال تزلف نجيعه
مغرورة بالغي تغري وتختال=تغري وتامر بالخطا والقطيعه
غانية ما تلبس البشت والشال=غيث نفيع ولايطول ربيعه
ما ينزله من نازله غير رحال=اما رحل هاليوم ولا تبيعه
تقفي ولو كانت تزخرف بالاقبال=تقبل غنوج ويوم تقفي لكيعه
احلامنا فيها عريضات وطوال=نبل الجديد ونرتجي من رجيعه
والنقص فالاعمار ماهوب فالمال=وكف الكريم لها من الجود ميعه
والشيخ ريف فالعسيرات وظلال=بستان جود ما يشح بطليعه
ولا الردي يلحق ردا جده الخال=ما ينبت النعناع شوك النقيعه
عزالله انه غاب عن نجد رجال=وضاقت بعد كانت علينا وسيعه
رجل من معين الرياجيل نهال=اما فطيم المجد ولا رضيعه
مرحوم ياشيخ للاثقال شيال=معنا بخير ولا علينا هزيعه
تنعاك قوم وقوم يارجل ورجال=برقا وروق وشوخ هيلا شجيعه
شيخ له البيضا على كل ما طال=سوق المراجل يشتريه ويبيعه
بيته لضيفانه مذرا ومقيال=من جوده الاجواد جادت طبيعه
حيد من الهيلا له حجي وقذال=يذري ذراه ولايدور منيعه
ماعيل بن جامع بعمره ولاعال=وان عيلت عتيبه حما الشيخ ريعه
ساطي على الفرجه عزوم وبتال=في الصف الاول من خيار الطليعه
حلحيل لعقود الحلاحيل حلال=وغيث من المنشا عموم نفيعه
ترجح معاديله على كل معدال= شيخ رحل كله وباقي صنيعه
والحي يفنى والشواهيد الاعمال=صولات بقعا بين اهلها مريعه
شيخ لما عاجوا هل الكيد عدال=سيف تهاب اخصامنا من لميعه
يوم السرايا نمر رجلي وخيال=مع قايد الوحده نصير الشريعه
له وقفة تحسب على العاتي الضال=هاك الزمان اللي يشيب رضيعه
صوله بعدصولة شغاميم وعيال=حر يسر مقرنسه بتفريعه
شيخ الكرام اللي لهم فالعسر حال=بسط اليماني والنفوس الرفيعه
عساله الجنه مخلد منزال=ودار بدل داره وسيع بديعه
يكسا من السندس عمايم وسربال=وغفران ذنب وفي حياة وسيعه
يدنى من الجنه ويبعد عن الصال=ويكفى الحساب ومع محمد شفيعه
في جنة نعيمها الوان واشكال=متخالط نضيدها مع هنيعه
فيها السلام اطيب من الحض والفال=اللحضه الوحده حياة متيعه
مامتع ابن ادم متعها ولانال= اخير من رضوان رب مطيعه
ويسقي ثراه من المراويح همال=يشبك زهر نبته وتخضر تليعه
وعن لابتي عزيت بدع بالامثال=من هاجسي جتني طويع مطيعه
الابه اللي تحول وتنحال=ولا فالقبايل من سلفها وضيعه
وانا اللذي مامال حضه ولا مال=ولا له على الزلات نفس تطيعه

آخر تعديل عقاب بن سقيان العتيبي يوم 08-Sep-2008 في 01:35 AM.