قصيده اعجبتني منهو الشاعر للي يعرفه

[سعد الربيعي]

هذي طبوعي كل ما عسعس الليل
أصلّـح الدلـة وأجـر اللحونـي
بريـةٍ موزونـة البـنّ والهيـل
والماء بوزن وحيّ هاك الوزونـي
منهـا تكيّفنـي ثلاثـة فناجيـل
وأرتاح ويطير السهر من عيونـي
وأراجع الذكرى وأجـرّ المواويـل
والذكريات بكـلّ شكـلٍ ولونـي
البعض منها يشرح الصدر بالحيل
والبعض لا والله يجـدد طعونـي
وأرجع وأفكّر في الليال المقابيـل
لعل وقتـي مـا يخيّـب ظنونـي
وأدخل على الله من حياة الغرابيل
حيث إن همّي ما تشيلـه متونـي
كنّك مفصّل فوقي الهـمّ تفصيـل
لين إلتبسني مثل لبس الجنونـي
حالي كما حال القلوب المشاغيـل
اللي من أطرف شـيء يتأثّرونـي
لو يشتكون الغبن والجور والميل
للغيظ وسط صدورهـم يكتمونـي
فكّرت الا الموضوع يحتاج تحليل
وفنّ الدراسة واحدٍ مـن فنونـي
عرفت وش عكّر مزاج المشاكيـل
يوم إنهم من وقتهـم يشتكونـي
أول سبب: نقالـة القـال والقيـل
ا لطغمة اللـي جعلهـم يذهبونـي
قلوبهـم بالحقـد سـودٍ مغاليـل
ومن طبعهم بالمشكلة يفرحونـي
وثاني سبب: ناسٍ على مثل ماقيل
لا يقطعون الشّـر و لا ينفعونـي
والله ما يرفع ضغطك إلا المهابيل
العالم اللي في النحـر ينشبونـي
وثالث سبب: ناسٍ سوات المخاييل
على سلوم الطّيب ما يحرصونـي
خلّو سلوم أجدادهم رغو مع سيل
وفي عالم التقليد جو يركضونـي
طشّوا عمايمهم ولبسـوا بناطيـل
والموس فال أشنابهم والدقونـي
وأرقابهم ما سلمت من السلاسيـل
تطبّعوا بطبـوع هيـم البطونـي
في ذمتي ماعـاد باقـي رياجيـل
إلا القليـل وجعلهـم يثبتـونـي
صفّة بعد صفّة وجيلٍ بعـد جيـل
كلٍ من اللي قبله أنقص وأدونـي
هذي هي الأسباب من دون تفصيل
شرحت روس أقلام بس أعذروني
واللي يبي تفصيل بالحيل بالحيـل
يقـدر يكلمنـي علـى تيلفونـي