يابو مناسيب...وش معنى مناسيب!!؟؟

[معجب العتيبي]

بندر المرشدي

الأولة مرحبا مليون ترحيب=والثانية وقف.. وحلّل كلامي
يابو مناسيب وش معنى مناسيب=عليك ضاعت ملايين الاسامي

أبو مناسيب

دام البقابك عدد مايقنب الذيب=واعداد مايجلي النور الظلامي
الاسم هذا مثل شلفا تراحيب=موروث به ماتلحقني ملامي

بندر المرشدي

أن كانه اسمٍ لجدك مابها عيب=وان كان غيره عليك الطير حامي
تترك عتيبة.. تمثل بالجانيب=وربعك لهم شلفٍ تقص العظامي

أبو مناسيب

أسم ورثته بلا شك ولا ريب=ياللي تلد النظر شرق وشامي
معهم ليا ولعت روس المشاهيب=والاسم راسخ على طول العوامي

بندر المرشدي

طيب نبا نغير الموضوع ونجيب=طاريك بين الرياحي والزلامي
دقشه خفيفة وجت في رفرف الجيب=ولا ضرته دام هو حسب النظامي

أبو مناسيب

مذكور بالطيب واكمل مواجيب=وانته تنيرت يالطير التهامي
انا اشهد انك تعرضت اللواهيب=وانا مع اهل الاشده والمسامي

بندر المرشدي

فالمعرفة خابرك ما من تجاريب=الا يدينك على الفاضي تواميّ
رصيدك اصفار...وتحب الاكاذيب=وحنا نعرف الصقور من الحمامي

أبو مناسيب

مابي شهادتك ياللي حادر شعيب=تلعب معي ودك بعال السنامي
ضيعت حجتك ودك بالمهاريب=لاتدفن الرأس ياطير النعامي

بندر المرشدي

امّيل عقيلك ومركب شنيب=فرحان في صورتك ياذا الغلامي
آثرك شاعر قوي... بالحيل وصعيب=عسى الولي منك يكتب لي سلامي

التوقيع