طبيت فى سوق الفنون وتنقيت*اجنب الغارب لراس السنامى

[الحطيم]

هاض الغرام بخاطرى واستحسيت=وغنيت يومنه تهيض غرامى
هاجوس قلبى مثل ضرب الدنميت=يضغط على اعصابى ويوقظ منامى
كنه ليا منه قبس عود كبريت=والا وهج نار اكسجين اللحامى
واليا دعانى داعى منه لبيت=وافطرت بعد ايام طول الصيامى
فلهمت واستلهمت مما توريت=واخترت للمعنا سمين الكلامى
سميت وارويت القلم واستعديت=وحطيت كلمة كل نقاد امامى
تفاعلت كل المشاعر وخليت=راس القلم فى بيض الاوراق حامى
وطبيت فى سوق الفنون وتنقيت=اجنب الغارب لراس السنامى
وليا تحدانى زمانى تحديت=وحطيت فى جال الكريم اعتصامى
حامت بى الافكار واقبلت واقفيت=وفى خاطرى ضيقه ولا ادرى علامى
ارهيت بالهقوات واصبت واخطيت=وياما رمى واخطا الهدف كل رامى
ياجاهل الدنيا على كف عفريت=سود لياليها وظلم وظلامى
مر عسل صافى ومرات حلتيت=ماقط قر الها قرار ونظامى
كم شفت منها حال واحوال اوحيت=وقام يتغير حالها كل عامى
وتشتتوا فيها هل الكار تشتيت=وحل المرض بقلوبهم والخصامى
راحوا صماصيم الرجال العناتيت=اللى مجالسهم بها الانسجامى
محمودة الاذكار مرفوعة الصيت=اللى لهم فى كل عليا مقامى
راحوا وجانا بعدهم قرد ونهيت=ناس مغير اجسام نفخه واسامى
كم واحد تسمع علومه كلاميت=وليا بغيته فى اللزوم انهزامى
ولانى بعم الناس من غير تثبيت=تكرم سبال الطيبين الحشامى
ياللى سمعت العلم ياليت ياليت=كانك نبيه وعالى الاهتمامى
بالك تفوت فرصة العمر تفويت=لا سانعت لك فاغتنمها اغتنامى
حتى تسد افواه كل الشماميت=اللى عليك يدورون الملامى
والكلمه اللى ما عليها تثابيت=لا تشتريها لوها ما تسامى
هذا الكلام اللى من اجله تفانيت=من فيض هاجوس سريع الولامى
اقولها للحى مهوب للميت=لعل تفهمها القلوب الفهامى
ولو ينفع العبد التمنى تمنيت=مير التمنى ما يفيد الانامى
تمت وانا فى شانها ماتقاصيت=اقضب رسنها لا تزم العدامى
وتقبلوا من غالى الدر ما ابديت=وازكى تحياتى وطيب سلامى

اتمنى ان تنول على اعجابكم