البارحة مانمت من ضيقة البال

[فهد الدعجاني]

البارحة مانمت من ضيقة البال = عز الكرى يدخل عيون شقيه
مانام طرف اللي غدا فية ولوال = يكبت هموم في ضميره قويه
بالروح حسرات وباالصدر ملال = والقلب عبراته جروح طريه
أضرب كف بكف مانيب محتال = كل الحلول أمست عسيره عليه
أسباب ربعن يزحموني على الجال = شفت الخطا منهم والاذيه
عز التفاهم بيننا حال الاشكال = والمشكله كلمة وصارت قضيه
ذنبي نطقت الصدق ماقلت بطال = ولا نعتقد بالصدق ذنب واسيه
لكن ناسن تكره الصدق ينقال = وتخطي اللى مايسوى خطيه
قلوبهم فيها الردا والحسد كال = والحقد معميهم خباث الطويه
باالزور والبهتان والكذب تكتال = اقوالهم تبعد عن الواقعيه
ماشفت فيهم غير ماكر ودجال = من عندهم ضاع الوفا والحميه
ناسن على الفوضى خفيفين وعجال = من غير تفكير عميق ورويه
أما بفعل الخير يبطون وثقال = خطواتهم للخير دايم بطيه
وليا نصحهم ناصحن زادوا اجفال = والنصح مايدخل قلوب مغطيه
والناس ماتقدر على هداية الضال = والعلم مايدخل قلوبن صديه
هذي حقيقه مابها شك وجدال = والطق في الميت حرام وجنيه
ومن لاتعلم مايفيدن الاقوال = والدرس تفهمه الرجال الذكيه
والجاهل اللي يحسب الناس جهال = ويشوف نفسه صانع العبقريه
يمشي خطا ومن الكبر صار يختال = غره زمانه والسنين الرخيه
غير التشدق بالخطا ماله أفعال = الهرج بايخ والفعول انكريه
هماز لماز مخـــادع وحيــــــــال = ولا يحرى الا بالفعول الرديه
واللي يحز النفس ينسب من ارجال = خبل سواليفه توسخ شفيه
ثورن هبيل بان في جسم رجال = نقص على ربعه وكل السميه
صورة عليها ثوب وشماغ وعقال = دميه تحركها يدينن خفيه
ماهو من اهل العز يذكر ولا المال = خسران بالدنيا وفي الاخرويه
لاخير في اللي شغله القيل والقال = فرقاه نورن وارض ربي فضيه
والارض ماضاقت على مد الاجيال = والارض ممدودة لكل البريه
والبعد مغنم عن مجاورة الانذال = لوهم جماعه ما لهم قابليه