(( المعطي الله )) ...

[بدرالهبيري]

بسم الله الرحمن الرحيم



السلام عليكم ورحمة الله وبركاته

مسْـــاكم او صبْحكم الله بالخير ,, انشالله مرتاحين ..


أتقدم لكم بهذه القصيده المتواضعه وجدتها
بين ركام السنين وعسى ان تنال لو ربع اعجابكم

رصيدك المليون والعشر مليون
وانا رصيدي في حياتي قصيدي

ولااملك الا كم طواريق والحون
وانضم على معناي قاف(ن) مشيدي

هي حيلتي يوم الهواجيس يطرون
وادوايْ يوم ان الدوى مايفيدي

العيد حل ّ وفي ضحى العيد محزون
نمشي بنار وغيرنا في جليدي

ولهو حسد عل ّ الحواسيد يفنون
ربك يدبْر مايراه ويريدي

أرزاق دبْرها لنا خالق الكون
مكتوبة(ن) من قبل ماني وليدي

لاشك اعبْر عن خفى قلب مكنون
تعبير عن مبدى الشيَم مايحيدي

ياصاحبي يانقوة الناس وشلون
عنك ابتعد وانت بحياتي رصيدي

حتيش لو تملك مثل مال قارون
قدرك بقلبي كل يوم(ن)يزيدي

والله لولا خوف ليقال مجنون
لااشق جيبي واعتزي ياعضيدي

لاشك هذا سلـْم والسلـْم قانون
قديم ماهو في عربنا جديدي

الله يساعدني ومنه اطلب العون
عسى نهار العيد عيدي سعيدي

والفقر ماهو عيب والناس يدرون
والمال خير وشر علم(ن)وكيدي

المعطي الله والعرب له يدينون
وحده يَهبْ رزق الدبش والعبيدي

ماحط دون الباب حرْاس واحصون
ولاوسيط ولاتلكس وبريدي

مفتوح بابه كل ساعه ومضمون
يسمع ندى اللي يندبه يالمجيدي

ملاذ للخايف وملجا لمغبون
عز الضعيف اللي اهيامه شديدي

لاكبر ت الدعوى له الكل يرجون
واللي نصى غيره يخيب ويبيدي

ولو يملك المخلوق مهما ,, يجي دون
ملك الكريم اللي بحكمه فريدي

كل الملا في حكمته غصب يمشون
اللي رضى واللي برايـــِه عنيدي

هذا الصحيح وقولوا اللي تقولون
والحق مايشناه غير البليدي

وسلامتكم ...

اتمنى انني قدمت مايرقى للذائقه ودمتم ..
تحياتي وتقديري ..بدرعيد ..