مـن روائـع الشعــر الشعبـي

[ابوفادي]

ياونـة ونيتهـا مـن خـوى الـراس=مـن لاهـب بالكبـد مثـل السعيـره
ونين من رجله غـدت تقـل مقـواس=ويون تالـي الليـل يشكـي الجبيـره
وياحمس قلبي حمـس بـن بمحمـاس=وياهشـم حالـي هشمهـا بالنجـيـره
وياوجد حالي يا مـلا وجـد غـراس=يوم اثمرت واشفا صفـا عنـه بيـره
من ثمر قلبـي سـرا هجعـة النـاس=متنحـر درب عسـى فيـه خـيـره
الله يفكـه مـن بـلا سـو الاتعـاس=ومن شـر عبثـات الليالـي يجيـره
فى ديـرة تقطعـت عنـه الارمـاس=سبعيـن يـوم للركـايـب مسـيـره
لاوالله إلاحـال مـن دونـه الـيـاس=حـط البحـر والبـر دون الجزيـره
علق سلـوان وراء العيـن والطـاس=وقلبي علـى فرقـاه تسمـع فريـره
يالله ياللـي رد مـن عقـب مايـاس=يوسف على يعقوب وابصـر نظيـره
ترد على أدباس يـا محصـي النـاس=ياعالـم مــا بالخـفـا والسـريـره
يادباس أنا بوصيك عن درب الادنـاس=تـرى الـذي مثلـك يناظـر مسيـره
عليك بالتقـوى تـرى العـز يادبـاس=فى طاعة اللـي مـا ينجيـك غيـره
هذي ثمان سنين من رحـت يادبـاس=لا رسالـه جتنـي ولا مـن بريـره
يادباس من عقبك ترى البال محتـاس=وعليك دمـع العيـن حـرق نظيـره
وعليك كنى فى دجـا الليـل حـراس=أصبح على حيلـي وعينـي سهيـره
أصبح انا مابيـن طـاري وهوجـاس=وطـواري تطـري عليـنـا كثـيـره
مثل الوحش قلبي على كـف حبـاس=يكفـخ كمـا طيـر اسبوقـه قصيـره
متحير من عيلـه البيـت يـا دبـاس=ارجى ثـواب الله وأخـاف المعيـره
أخاف من حكي العداء ثـم الانجـاس=أهـل الحكايـا الطايلـه والقصـيـره
ويقال خلا عيلته عـن نـزا الـراس=أقفـا وخـلا عيلـه لـه اصغـيـره
والا فنا يـا بـوك قطـاع الارمـاس=مانيـب مثبـور أو رجلـي كسيـره
أصلك لو دونك نبا حمـر الاطعـاس=الصلـب والصمـان دروب عسيـره
مهالـك مـدارك مـا بهـا أونــاس=إلا الثعـل والبـوم تسمـع صفـيـره
لو كنت فى نزوى وديرة بنـي يـاس=أهـل المـوازى والوجيـه الغبيـره
عبـادة الاصنـام شرابـة الـكـاس=الخمـر والتنبـاك فيـهـا وغـيـره
لاركب على وجنا من الهجن عرماس=فج النحـر يادبـاس حمـرا ظهيـره
متروسه الفخذيـن مزبـورة الـراس=كن الخـلاص اعيونهـا يـوم أديـره
ياشبـه ربــد تخـفـق بـالاونـاس=وان رفعـت جنحانـهـا مستـذيـره
تنشر من العوده على نـور الانفـاس=عند الفجـر والليـل مقفـي مريـره
والعصر بالصمان تسمع لها اضـراس=حبل الرسـن خطـر تبتـر جريـره
ونهـار ثالـث بيـن حمـا الاوراس=وارأي أمـك جعلهـا لـك سفـيـره
ثـم أركـب ساقيـه تقلـب الـراس=تمشي بهلها فـى البحـور الغزيـره
إلى مسكت الفيحاء بها الخير محتـاس=لولا الكفـر والشـرك يـاوي ديـره
فيها الطبيق وراهـي الخبـز يادبـاس=يقعـد خـوى الـراس خنـه خميـره
هى ديرة اللي باغـى كيفـة الـراس=ولا له حد همـه مـن النـاس غيـره
هيس بذرى الاجواد لصحاف لحـاس=يفـرح الـى نيـدى لذبـح العقيـره
ذا ما قفك يادباس مـا فيـه نومـاس=يصلـح لقيـن مهنتـه طـق زيــره
ترى الضراوي دون وأنت انشدالنـاس=راعيـه مـا يذكـر بخيـر وغـيـره
ماله سوى حذوا لحنك منـه واليـاس=والى انقطع خرجه فـلا لـه ذخيـره
طلب المعيشـه بالحراثـه والاجنـاس=المشتـري والبيـع يوصـف وغيـره
هم انهض العيرات مـع كـل فـراس=يـادبـاس دور خـيـر تستشـيـره
جـدك وعمانـك هـل العز.والبـاس=أهـل اللـوازم مكرميـن القصـيـره
يادباس ما يصبر على البق والحـاس=إلا الـذي مالـه بنـجـد عشـيـره
واليـوم يامـروي شبـا كـل عبـاس=أنـت يـا لطـام وجيـه المغـيـره
عشرين عام كلها أرجيـك يـا دبـاس=مثـل الغريـر اللـي تولـع بطيـره
عـد المناكـب هيلـع فـرخ قرنـاس=يمناه فـى لطـم الحبـاري شطيـره
عانق خلوج روحت عقـب مـرواس=عنـد العصيـر لبيضهـا مستـذيـره
والليل جاه وحال مـن دونهـا اليـاس=روحه علـى فرقـاه فـرت فريـره
يادبـاس أنـا يابـوك مانيـب بـلاس=ميـران عيـلات الرفـاقـه كثـيـره
جنبت وسط السوق وامشي مع الساس=وأخـذ قليـل الحـق واتـرك كثيـره
يا دباس لو جبت لى من دحب الاكياس=مختلفـه مــا بـيـن زر ونـيـره
مالـي بهـا ياجعلـه بألـف قـبـاس=ويعلهـا تذهـب ولـو هـي كثيـره
يادباس قلبي كـل مـا هـب نسنـاس=شرقيـة هـبـت بقلـبـي سعـيـره
والحال يافرز الوغـى مسهـا البـاس=عليـك يـا ناطـح اوجيـه المغيـره
وغصون قلبي يا فتى الجـود يبـاس=غـادي أنـا يابـوك كنـي هشيـره
مـن شافنـي يقـول ذا فيـه لسـاس=واللـي بـرى حالـي إلهـي خبيـره
لا وعلا مـن قبـل غـوال الانفـاس=وامفـارق الدنيـا يجيـنـا بشـيـره
عسى يطق البـاب والنـاس غطـاس=ياوالـي القـدره علـيـك اتعبـيـره
وصلاة ربـي عـد ماهـب نسنـاس=على النبـي عـدة احقـوق المطيـره