الـذيب في راس الـطـويـلـه

[معجب العتيبي]

عاشق المخايل

من بعد ما طال الغــياب الكل ينظـر للمطر = سلام يادار لها شهرين ما مريتها
يـاسادت الشعار يـوم العلـم يلقاله مقـر = الـذيب في راس الـطـويـلـه والعرب في بيـتها

مرزوق حمدان العتيبي

من بعد ماطوّل غيابك ويش جبت من الخبر؟ = يامرحبا ترحيبة ٍ يظفي عليكم ليتها
الذيب في راس الجبل واليا سمع صوتي جحر= يوم السبب هاك السواه اللي معه سويتها

عاشق المخايل

ياللي تــدور للخبر واسـمع ونفـذ للامر = ردوا مقرد قومكم ولا ترى رديتها
الـذيب ما عدى الجبل الا بعد طال الحشر = واليـوم يايوم السـعد والطيبه جـريتها

مرزوق حمدان العتيبي

حنا هل المعروف ورجال المراجل والظفر = ياصحابنا اللي بالكلام الزين شايع صيتها
افهم كلامي ياقوي العرف واحذر واعتبر = والزم طريق الخير وانشد كان مادليتها

عاشق المخايل

الخـير في كل القبايل ما يعد وينحصـر = وامـطير تفرح بالنـشاما دايم لا جيتها
لا والله الا جـاك يامـرزوق واعيونه حمر = قـال المـثـل يـاصـاحبي خـميتها واخطيـا

مرزوق حمدان العتيبي

كل القبايل فعلها معروف ما انقصها قدر = ومطير مثل الناس يارجال ماذميتها
ان جيت وعيونك حمر ترجع ومغديها صفر = مرخي لك احبال الشعر واعطبك لاشديتها

عاشق المخايل

مرزوق لا تبعد بعيد دخلت في جوف الشجر = ترى المباري لا ابتعد فالعين مالديتها
ان كان تبغا للقشر ما عندنا غير الـــــقشر = النفس في كل المراحل ياعرب ضريتها

مرزوق حمدان العتيبي

ضريت نفسك يالمطيري يوم طبيت البحر = والكارثه كف الندم عقب الطمع عضيتها
من يوم راح العير ماشفنا من مطيري شعر = ياليتها جابت ولد بعد الولد ياليتها

عاشق المخايل

خيبت ظني فيك مير اليوم والله ما تفر = الكارثه فوق العتيبي ياعرب مشـيتها
الله واكـبر يالعتـيبي كيف تنـكر للبـشر = ياليـتهم نامـوا هذاك اليـوم كان اغنيتها

مرزوق حمدان العتيبي

منت بممشيها على العتبان ياوجه الفقر = نعرف مرات اللي ترى محد ٍ جهل بكميتها
اللي قعد يكسر بيوته جعله لكسر الظهر = والحمدلله يوم من بعد الكسور انهيتها