كنز الكلام

[ناصر بن محمد العتيبي]

السلام عليكم ورحمة الله وبركاتة

عذراً من رواد وزوار منتديات الهيلا على الغياب

وشكراً للأدارة على هذه الجهود الرائعة التي جعلت من منتدى الهيلا

صرحاً يشاد به في كل مكان

وأليكم هذهـ المتواضعه

الشعر عند الناس غالي ومرغوب=كنز الكلام وكل جيل اعتنابه
يعمر مثل مايعمر البيت بالطوب=ولايستوي بني القصر والخرابه
حلفت بالله رب طه ويعقوب=اما سخرت القاف مادق بابه
لكب لاهل الشيل صخري ومسحوب=وخلي المجرور لأهل الربابه
ولاعن الماجوب والله ماتوب=اللين عمري ينتهي به حسابه
دام العمر مع جاري الوقت محسوب=ابغتنم قبل الفوايت شبابه
النوم عن فعل المواجيب عذروب=ومن يترك الماجوب وش ينبغابه
ولا الزمن في كل يومين ملعوب=وماطوعه غير النبي والصحابه
تجري بنا الايام غالب ومغلوب=وماقدر الله كل مؤمن رضابه
واللي جرا في ماضي الوقت مكتوب=محدن درابه لين صار ودرابه
طبع الدهر دوار دالوب دالوب=بين الحلا والمر دايم شرابه
ياعابد الدنيا كفى ظلم واذنوب=القيظ لاتضميك ضيحة سرابه
حتى ولو حقق لك الوقت مطلوب=لاتامنه لو زان عجل انقلابه
كم واحدٍ عقب الهنا صار منكوب=والمعتبر يعرف خطاه وصوابه
خلك مع اهل الطيب طيب ومحبوب=خل القشر ما فالمشاكل ذرابه
لاتحسب ان ماخلق في غيرك جنوب=ولافيه غيرك له عزاوي ولابه
الناس تجمعهم وتفرقهم ادروب=والطيب دربٍ رابحٍ من مشابه
كلٍ معه بالهرج تعبير واسلوب=مير البلا بعض النوايا تشابه
دار الزلل وحذر من الهرج مقلوب=ان لم تكن ذيبٍ كلتك الذيابه
هذا شروق الشمس والتالي اغروب=اليوم واللي عقب مامن غرابه
قل للذي قد صار له بطن وثروب=الوقت مثل الداب سمه بنابه
الاوله منا سلاطين وشعوب=والثانيه كلٍ يسلم كتابه