الردايا المناجيس

[بدر ناصر المورقي]

مافيه طيب بالردايا المناجيس = الطيب يظهر بالرجال القرومي
ولا الردي يرِّث هموم وهواجيس= مخزي ومن طبع الحرار امعدومي
الوجه مظلم لو يركب فوانيس = عايش دني النفس جهل وظلومي
لا شفت زوله قلت هذا هو ابليس= او حية رقطا تبث السمومي
صديع, راسه مابه الا وساويس= علّه على زودٍ يزيده همومي
ناكر جميل ومن وجيهٍ مناحيس = انحس عمل وطبوع من وجه بومي
فوق النحاسه ضمن ناسٍ متاعيس= ماله ورى سوق الرياجيل سومي
له لحيةٍ ماقربتها النواميس= ماهي على حرٍ يطول النجومي
ممشاه كله درب كذبٍ وتدليس= ممشى خبيث النفس ولد الرخومي
لئيم غدار امعدوم الاحاسيس= من طاح في محبالته مايقومي
يبقى ردي لو يعتلي عرش بلقيس= اويعتلي من فوق عالي الغيومي
ماصاحب الا الحر نسل القرانيس= مكرّم اليمنى قوي العزومي
ضيغم ولد هاك الاسود المتاريس= من وصلهم تنعم بعزٍٍ يدومي
لحتجت له وقت الليالي المعابيس = شفت السعد لاشفت زوله يزومى
ياطى على روس العفون الاباليس= لطام وجه العايل ان جا يهومي
في جوده اكرم من غيوم ونسانيس= وعلى الضعيف ارحم من امٍ رؤومي
جزل العطا من دون حد ومقاييس= عطاه يفرح كل قلب امحرومي
والعز ثوبه ظافى له على القيس= ومطرزٍ بالطيب حد الكمومي
ماهو من اللي من الشهامه مفاليس= ولاهو من اللي فوق جيفه يحومي
وانا بدر ماني من اللي ملا الكيس= بشرور واحقادٍ ووجهٍ شؤومي

بدر ناصر بداح المورقي