ماضاق صدر ولا انحنى راس مرفوع

[عبدالرحمن الهيلوم]

الابيات مختاره من هذه القصيده وهي لشاعر سهلي (مفرج بن قاسي السهلي ) شاعر المحدار

أسبوع مرّ !! ولاوصل منك مرسـال
ياقوّ قلبك كيف تقطعنـي أسبـوع ؟!
الجوع كافر ! وانت ماترحـم الحـال
وانا عليك من الولـه ميـت ٍ جـوع
ياللي غيابك صعب يطري على البـال
تركتنـي ضايـق وحايـر ومفجـوع
ماكنّـي الا: شايـب ٍ فاقـد عـيـال
وماكنك الا: محرّم ٍ حـق مشـروع !!
يفوع لـك قلبـي ليـا مـر الاطـلال
ياليت مالـي قلـب يشتـاق ويفـوع
حسبي عليك شلـون قطّعـت الآمـال
بآآآموت لاصار الامل فيـك مقطـوع
ياصاحبـي ماكـل نــزّال رحّــال
انت الحيّا من وين مارحت متبـوع !!
نسيانـي لـزول ٍ بالاعمـاق يختـال
اصعب على صاحبك من حبة الكـوع
لو الثمن في شوفتـك عمـر رجـال
كان الثمن من يوم ماغبت مدفـوع !!
ولو القدر مـا تـم قولـه ليـا قـال
ماضاق صدر ولا انحنى راس مرفوع
ياصاحبـي عشقتنـي فعـل وخصـال
وانا عشقتك شعر واحساس وطبـوع
وشلون تتركني كذا لا اشهـب الـلال
وقدّام عيني تجف ينبوع .. ينبوع !!
وانا عشانـك جيـت والغيـم همّـال
اسيّـل الوديـان واداحـم جـمـوع
ماردّنـي عنـك سوالـيـف عــذّال
تزعل عليّ ربوع وتقـدّر ربـوع !!
كان المهم اعيشـك جنـون ووصـال
ويكون لي كلمه ولـي راي مسمـوع
واليوم ضاقت بي مـن الجـال للجـال
فرقاك تقصـم ظهـر وتحـز وتلـوع
لو جيت شفت الحال ماسـرّك الحـال
في غيبتك ضايـق وحايـر ومفجـوع
هذا غياب اسبوع وشلون لـو طـال
طالبك .. لايطوّل غيابك عن اسبوع !!